Neidaw wa i bynta u sarok wa em ha Lumshnong da chlai um biang i mar ya hiar slap hanla ini wadep u DC da ong u wa da dep wow leh yeiwa emkaam, tangwa ynne u sarok da chlai um biang u hadien wa hiar slap, kamtæ neiliang ka KSU Narpuh Circle da pyntip ko wa daw khang ko chipor ya ka Toll Plaza wa em ha Lumshnong nei wym leh iwon iwon hajrong i dap um u sarokbah NH-06 hajan Police Station Lumshnong iwa da jan dap la chi bnai.
Ka seiñ da ong ko wa ka NHAI da suki donhi ko khlem leh iwon iwon hadooh wa ki kari khian hap lai ki na sarok khloo ryngkat i ktieh wa ki thlu wa dap um ktieh iwa daw ktah leh ya ka kari.
Ka seiñ da ong ko wa i lai khang ya ka Toll Plaza toh yow pynpai yei chkoor ka sorkar waka NHAI ki wym pyrkhat de yei eh ki paidbah wot hadien wa dadep ka chnong leh wow ujor hajrong ini i jooh khamtam deiwa pyrkhat leh ya ki kari wa kit ya ki bru wakjut.
Kamtæ da ong wa ini toh i kaamram yong ka NHAI wow pynchna ya u sarok, wei da e por chi sngi wow pynkhooid ya ka um ha ini i bynta wa kamjooh hajan Kuliang, wei wow chna bha ya ki dooid ha lynter u sarokbah.
Ka seiñ da kdaw ko leh wa u sarok da sdang biang u sih du hapoh 6 bnai wa dadep chna ya oo du neidaw wa leh tangdep yei rukom pynchna.