Ka sorkar jylla ynne da pynbna ko wa da rai ko wow khang ya waroh ki thaw psiah (Entry Point) chapoh ka jylla nadooh ka 24 hadooh ka 31 tarik uni u bnai kiwa kynthup ya Byrnihat, Ratacherra, Bajengdoba, Tikrikilla, Mirjumla wa Hallidayganj.
Hawa pynbna ya ini, neiliang u symbood montri rangbah ka jylla u Prestone Tynsong da ong u wa ini mut wa ya kiwa liwan chapoh ka jylla daw hap neh chwa ki cha ki thaw wa em ki hadooh wa wai biang ya ki Entry Point haka 01-08-20.
“Kini ki Entry Point toh kiwa da krehkaam kattu la 4 bnai wei ki wakreh ha kini ki thaw man ki kiwa da ngiah kiwa da emkaam chuti wei da em leh kiwa da chitom,” da ong u Prestone.
Da pyntip u leh wa ha ini i por, daw kyrriah leh yaka thaw psiah wa em ha Byrnihat cha jan ka yingkieñ Byrnihat neidaw wa em leh i ujor naka Assam yei thaw wa booh yaka Entry Point wa katni neidaw wa thut ki bru ka Assam wa lai cha Upper Assam.
Chooh chooh da pyntip u wa ini ym mut wa da khang yei lai luti ki kari na Assam yow lai cha Assam lyngba ka jylla kamjooh yaki kaam wa jhan (Emergency), Medical Services wa ki kari kit mar wa emkaam.
Hawa kylli, u Prestone ong u wa ki chipai haap ki hapoh ka kaam Emergency wei yaki ym em khang.
Ha iwi tawon i liang, u montri i chait i khiah da pyntip u wa kiwa da liwan chapoh ka jylla da em ki 21,077 ngut hadooh ynne i sngi.
