Ka United Democratic Party (UDP) waka Hills State People’s Democratic Party (HSPDP) da ya krehlang ki hapoh ka Regional Democratic Alliance (RDA) yow pynmih uwi donhi u kyrtong neibynta ka Election MP ha u snem wow wan.
Yei pyrtuid u kyrtong ym pu em da chim rai tangwa da em 3 ngut kiwa da em hakhmat kitæ u President ka Khasi Author Society (KAS), u DRL Nonglait, u President warim ka HYC uwa man leh kam u muktiar, u Robertjune Kharjahrin wa u MLA warim ka Mawlai, u Process T Sawkmie.
U heh ka UDP uwa jooh man leh kam u MLA, u Dr. Jemino Mawthoh da kyntu u ya kiwi ki seiñ saiñhima ri-loom wow ya krehlang ki neibynta ka jaitbru.
Da ong u wa lada em kiwi kiwa kwah wow ya ksohkti lang, da man ki kiwa smat wow yatylli lang yow wanrah ya ka jaitbru wa yatylli kamjooh ki seiñ saiñ pyrthai.
Da ban joor u wa ka UDP deilang waka HSPDP toh ki ar tylli ki seiñ ri-loom kiwa da rim dooh wei da ya krehlang ki nadooh nachwa kam ka wi donhi ka bor neibynta i bha i miat ki bru.
Hawa kylli won lada yaklam ki waka Voice of the People’s Party (VPP) heiyatoh wow pynyieñ uwi donhi u kyrtong, u Jemino da ong u wa ym pu em i yaklam waka VPP.
Da ong u leh wa lada yaklam waka VPP ymtoh iwa sih neibhah kam ki seiñ ri-loom em ki ka jooh ka thong wei thrang kamtæ da ong u wa emkaam u man kiwa yatylli.
U Jemino ha ka MP Election 2019 da man u kam u kyrtong wa da mynjur lang wei da pynyieñ kam u kyrtong ka Meghalaya Democratic Alliance (MDA) deiwa yaleh na ka UDP deiwa kyrchaan kiwi de ki seiñ saiñhima wa kynthup lang ya ka National People’s Party (NPP) tangwa da rem noh u da palat chi lak Vote. Tangwa ha kani ka kynti won ym em de u ya krehlang ki waka NPP wei da thooh laad para seiñ ri-loom.
Kam wow pynkynmoo wa ka VPP da dep ko wow pynbna ya u kyrtong MP yong ka da u Dr. Ricky Syngkon.
Discussion about this post