U Bindo Mathew Lanong uwa man kam u MDC uwa dei thung namo u Nominated MDC na ka seiñ UDP, da rai u wow lai kyrchaan ya ka Executive Committee wa yahkhmat da ka NPP hapoh Khasi Hills Autonomous District Council (KHADC), heiwa da pyntip u leh wa mynstep ka sngi daw lai e u yei kyrchaan ha u CEM, u Pyniaid Sing Syiem.
Ini i rai yong u Bindo toh hadien wa ka UDP da lai lait noh ko na oo wei da khlem khut leh ya oo wow embynta haka yalang yong ka General Council ka Party kawa da dep pynman ini wa dep.
Ini wa jia ya u Bindo uwa man leh kam uwa yahkhmat ka UDP wei u Chief Adviser warim toh hadien wa da yakhun pyrchah u ha ka Election MLA kawa da man ha uni u snem hadien wa ka Party da kyntait ko wow e Ticket ya oo wow yakhun na Nongkrem Constituency.
Da ong u wa neidaw wa khlem khut de ya oo cha ka General Council, da chim u wa ini mut ko wa dang em u sa du i mynsien ha ka UDP wei man i leh kam i pynbna wym em de u hapoh ka seiñ.
Da ong u wa da em i yaklam waka Executive Committee wa yahkhmat da u Pyniaid kam u CEM, wei mynstep ka sngi daw phah u ya ka chithi wow e kyrchaan ya ka Executive Committee.
Hawa yatoh wa i dang neh u kam u Nominated MDC wot hadien wa ka Party da lai lait ko ya oo, da ong u wym ngiat u wa toh ki kiwa pynneh ya oo kam u MDC, neibah wa toh u President wa da khlaad noh, u Donkupar Roy uwa phah yei pyrtuid u wow man kam u dkhot ha KHADC wei hadooh katni dang pteiñ u ya ini i kaam MDC.
Discussion about this post