U Symbood Montri Rangbah ka jylla, u Prestone Tynsong da beiñ joor u ya u heh ka Liang Pyrchah, u Dr. Mukul Sangma deiwa ong wa ym em mat de u wow klam pyrchah ya kani ka sorkar wei ki paidbah leh ym chaniah de ki ya oo katwa kamtæ ieh yn klam u katwa ngait.
Da ong u wa u Mukul da jooh man Montri Rangbah u hadooh 8 snem, tangwa heipor yong oo neiyi i daw ymye u wow pyndep ya ka Crowborough Hotel, tangwa ha kani ka sorkar hanla em chiboon i eh i khor tangwa da ye ko wow wai ya kani ka Hotel, wei neini daw wai noh ya ka Marriott Hotel ha u bnai wow wan.
Heiyatoh wa i pynbaad u Mukul wa ka sorkar MDA ym em ko kawi wot ka Scheme tangwa da pynbood ya ka FOCUS na ka Scheme wa da wanrah ka sorkar u Mukul lyngba ka Integrated Basin Development and Livelihood Promotion Programme.
Neiliang u Prestone da pynbaad joor u ya u Mukul wow kynmoo u wa ha u snem 2017 chwa ka Election MLA 2018 da lai saam masi u ryngkat ka poisa T. 5 hajar cha ki paidbah.
Da ong chooh chooh u wa ka sorkar MDA da leh bha ko hei pynkrehkaam ya ka FOCUS wa ka Prime Hub wow wailaad yow seiñ khih, wei boon ki seiñ kiwa yoh myntoi na kani ka Scheme wei da sñiaw ki wa toh i kyrkhu.
