Ka sorkar Meghalaya ynne ka sngi da rai ko wow thung da ka “Single Member Independent Enquiry” yow takit yei chah pynbaad wa em i leh bakla hawa pynkrehkaam ya ka Supplementary Nutrition Programme (SNP) da ka Social Welfare Department.
U Montri Rangbah ka jylla, u Conrad K. Sangma da pyntip u wa da phah ya u Chief Secretary ka jylla, u M.S. Rao yow thooh yei pyrtuid ki Retired High Court Judge wow khlieh ya ka takit.
U Conrad da pynmit u wa mar ya thung ya ka Committee, daw e por 3 bnai wow e ya ka bui (Report).
Kam wow pynkynmoo wa ki pulit ka Assam da kem ki ya 1 lak churia u khoo u yong ka Meghalaya hapoh ka SNP Scheme na ka kudam u bru samen ha Boko ini wadep, iwa da pynman ya ka liang pyrchah ka Congress kamjooh wa ka BJP kawa em ha ka sorkar Meghalaya Democratic Alliance, kiwa da dawa ya ka takit hajrong ini i jia heiwa da pynlai cha wi ya u khoo ka Meghalaya.
Ki pulit ka Assam da khana ki wa 1 lak churia u khoo ka Meghalaya uwa hapoh ka Fortified Nutrition Programme da chem wa booh hapoh ka kudam wa em ha i thaw ka Maruti Quality Products Pvt. Ltd., wa em ha Chhaygoan Industrial Development Centre, Chhatabari wa haap hapoh ka Boko Police Station.
Ki pulit da ong ki wa ya uni u khoo da thap hapoh ki churia ka East Sunrise.
