Ka sorkar jylla ha ka sngi Thohdieñ da phah ko wow pynkhlan ya ki bor sonteri ha ka skurbah North Eastern Hills University (NEHU), Shillong hadien wa da mih i chah choh chah dat uwi u Assistant Professor, u Dr. Alok Singh.
U Symbood Montri Rangbah wa pait ya ka chnat Kaam Pohyung, u Prestone Tynsong da ong u wa ka aiñ daw leh ko yeiwa emkaam hajrong iwa jia ha NEHU, wei da khana u wa da phah ya ka chnat pulit wow pynkhlan ya ki bor wow e yada ya kani ka skurbah neibynta i chngaaiñ yong waroh nadooh kiwa lai puræ wa kiwa sikai.
Da ong u wa ka sorkar hadien wa da tip ko yei jia ha NEHU, da chim ya ka laad wow wanrah yei chngaaiñ ya waroh kiwa e chakri ha kani ka jylla, lada toh ya ki tre chnong kamjooh ki wym toh ki tre chnong.
U Prestone da kyntu u ya waroh wow sñiawbha ki wym toh u pyrkhat da kamwi næ wow yahbakla ya ki paidbah, neibhah ka sorkar ka chimkhia ko wow pyntikna wa waroh kiwa chong chnong u man chngaaiñ ki.
Hawa kylli hajrong i dawa wow wanrah da ki bor yada yong ka sorkar pyrdi, u Prestone da ong u wa ini i dawa u ieh hei stat yong ka sorkar jylla, neibhah ki pulit u leh ki yeiwa emkaam yow pynthikna wa kam ini i jia ymtoh de wow nang jia i.
Kiwa sikai ka North Eastern Hills University (NEHU), ynnin ka sngi da pynman ki yei pyrchah wei beiñ hajrong i chah dat u Asst. Prof. u Dr. Alok Singh ha ka janmiet ka 24 tarik hadooh wa da mynsoo u ha ki bynta yong i khlieh wa ka kti.
Neiliang uni uwa sikai ha ka Hindi Department ka NEHU da ujor FIR u deiwa pynmih yei pyrtuid u President ka NEHUSU, u Sandy Sohtun wa 5 ngut kiwi won kiwa emkti wow thombor wei dat ya oo hapoh ka yung krehkaam ha NEHU.
Discussion about this post