Ka Khasi Hills Autonomous District Council (KHADC) lyngba ka Khasi Hills Building and Structure Regulatory Authority da pynbna ko wow pynkrehkaam pura noh ya ka aiñ chna yung namo ka Meghalaya Building Bylaw, 2021 hapoh u pood ka District Council.
Neiliang u Executive Member ka Town Committee and Building Bylaws, u Paul Lyngdoh da sñiawngooh u ya ka sorkar jylla wa lyngba ka chnat Pynroi Sor wa da kyrchaan ko wow boh ya ki kyndon chna yung khamtam hei wow chna ya ki Home Stay wa ki yung wa boon mala (High Rise) khamtam ki Hotel.
Da ong u wa hadooh katni ka chnat Building Bylaw ka Council da tipmit ko palat 400 tylli ki manyung kiwa da yoh ya ka ram na ki Bank wow chna yung. Da pyntip u wa ya ki Form neibynta wow yohbor wow chna yung ye wow yoh na ka KHADC, wei i e bor ym slem i lada ye wow pynbiang chwa yeiwa emkaam.
Chooh chooh da ong u wa i tlot wow pynkrehkaam waroh chi kattu ya ka Building Bylaw da pynman ya kiwa boon wow kheiñ stiñ ki wow lai chaphrang wow chna hi ya ki yung khlem yohbor, kamwa man ka Moon View Cafe u Philospher Iawphniaw wa ka Ever Banlari Guest Home & Restaurant yong ka B Khongwar, ya kiwa ka kasari Meghalaya High Court da phah ko dei thoh wa man ki yung kiwa man pyrchah aiñ, wei ka kasari da klam che ko leh wa ki tre toh u yohbor chwa ki na ki bor kam na ka District Council.
Heiyatoh wa i su won ya kiwa mut wow chna yung emkaam ya i bor na ka Council, u Paul da ong u wa i dor rap duna i bar yeiwa da booh da ka MUDA, wei ya ki yung trep ym emkaam wow yohbor, katwa ki yung wow mane Blai won emkaam wow yohbor tangwa ym emkaam ki wow su, wei ya ki yung kiwa duna hei yoh i laa kiwa chna ha i thaw wa heh hapoh 50 Square Meter leh ym emkaam wow su.
