U Montri wa pait ya ka chnat Puræ Puthi ka jylla, u Rakkam A Sangma da pyntip u wa ka sorkar da rai ko wow booh sa ar tylli ki Degree College hapoh ka jylla ha uni u snem puræ wa katni.
Hawa yaklam wa ki laad pathai khubor ynne ka sngi, u Rakkam da ong u wa ya kani ka tyrwa dadep wow ya mynjur da ka Ministry of Education ka sorkar pyrdi.
Da khana u wa kini ki Degree College ar tylli toh kawi u booh ha East Jaiñtia Hills wei kawi won ha West Khasi Hills District.
U Montri da pyntip u wa ka chnat Puræ Puthi dadep pynbiang ko yei pynbna paidbah wow thung kreh ya palat 100 ngut kiwa sikai ha kini ki ar tylli ki Degree College.
Hawa kylli, u Rakkam da ong wa ka Patharkhmah Degree College wa ka Rongjeng Degree College daw sdang noh ki yei ya krehkaam hapoh uni u snem puræ wa katni wei da pyntip u leh wa ya ka Science & Commerce College ha Mawphlang leh ka sorkar daw sdang noh ko yei hikai myntu u snem.
Ha kawi won ka liang, u Rakkam da pynsñiaw u wa ka chnat da maad ko chiboon bah i tynjooh wei eh ha kini ki 40-50 snem wa da li, neibhah wa ka jylla Meghalaya toh ka jylla kawa em booh dooh ki skur, kiwa sikai hawa nujor wa kiwi won ki jylla hapoh ka ri.
“I em i boon jait kiwa sikai, tangwa duna i hei em ki yung skur wei kattæ hapoh i yahkhmat u Montri Rangbah, da sdang i yei pynkylla”, da ong u.
U Montri da ong u wa ha kini ki san snem yong ka sorkar MDA hapoh i yahkhmat u Conrad Sangma kam u Montri Rangbah, da chna ya ki yung skur wa thymme neibynta ki College, ki Secondary School, ki Lower Primary School kamjooh kiwi ki thaw puræ kam ki Polytechnic, ka ITI wa kiwi kiwi.
Heijooh i por, u Rakkam da pyntip u wa ka chnat daw pynmih noh ko yei pynbna neibynta wow thung kaam ya kiwa sikai Lower Primary ha ki skur sorkar.
Discussion about this post