Ka Meghalaya People United Front (MPUF) Khliehriat Circle da e ko dei thoh ha u Chief Excutive Member (CEM) ka JHADC u Thombor Shiwat heiwa da yahkhmat da u President ka Khliehriat Circle u Kyrshan Blah wa ki dkhot yong ka hei emlang u President ka seiñbei ka MPUF u Dapoiwanmi Laloo.
Ha i thoh, ka seiñ da booh ko ya i kyntu yaka chnat krehkaam ka JHADC wow sylli yaka Trading License, Labour License wa kiwi kiwi ki kot ki sla wa emkaam yong ki baar jylla neidaw wa katkam wa man kattæ hapoh Jaiñtia Hills da dap sa du ki baar jylla suda ha ki kaam khayi pateiñ wa kiwi kiwi de ki jait kaam.
Hadien i yachem wa u T. Shiwat, u President ka Khliehriat Circle da ong u wa u CEM da e u i kular hakhmat ka seiñ wow chimkhia u ya ini i kaam ha kini ki kajiak sngi wow wan, heiwa da ong u leh wa kani ka phang toh kawa emkaam bha wow leh. Da ong chooh chooh u wa ya kitu ki dukan ki wym biang ki kot ki sla lada chem ya ki, u khang khyrdep noh chi syndon wei ka Council leh u ya krehlang ko wa ka seiñ MPUF ya ini i kaam khnang yow man ko kawa jop.
U Blah hawa klam da ong u wa ka seiñ ym neh chah ko wow pait ya i wan mih yong ki baar jylla hapoh kani ka jylla yong i la kiwa wan mylla sngi næ wa wan khayi pateiñ, kamtæ kam chibynta wow ye u pynsakhiat ya kitai ki baar jylla wa biang ki næ ym biang ki ya ki kot ki sla yong ki, ka seiñ da lai e ko da i thoh ha u CEM ka JHADC wow leh ko ya iwa emkaam khnang wa ki baar jylla ym yoh ki wow leh tre chnong ha kani ka jylla ka yong i, daw wanrah ko leh yei yoh myntoi yaki tre chnong wow chimkti ki daki heithaw yong ki baar jylla lada toh ha ka khayi ka pateiñ wa kiwi kiwi ki jait kaam.
Da ong u leh wa katkam wa man kattæ, ka District yong i man ko kawi ka District kawa dooh khih dooh kreh nadooh wa khang ya u mooyong, kamtæ u Blah da maham u leh yaki tre chnong lada chem yaki bar jylla wym biang ki kot ki sla yong ki, ym toh u wan kam ki yaki dukan næ ki kreh yong ki baar jylla wow chah pynbiej ki yaka sanspah chihajar ki baar jylla.
U MDC ka Rymbai Khliehriat Constituency u Finelyness Bareh leh da kular u wow chimkhia yeini i kaam, da ong u leh wa kam uwa mihkhmat paidbah da e u yei kyrchaan ya MPUF, da ong u leh u yakrehlang lang u wa ka seiñ na ki ka por cha ki por.
