U MLA ka Mawhati Constituency, u Dasakhiatbha Lamare da ong u kiwa da jia iwa da palat ha ka Constituency da pynman ya oo wow rai wym yakhun de ya ka Election 2023 na Mawhati, tangwa daw yakhun noh na Nongkrem, neibhah man iwa eh wow lai cha Constituency neidaw wa boonkaam ha Shillong wei wow thooh ya ki myntoi neibynta ki paidbah wa kiwi kiwi.
Da ong u wa kam uwa mihkhmat, lada kreh lane yarap katwon katwon leh, tangwa lada ym yoh won wow yajan wa kiwa dooh wa duk ym em yumut, wei da pynrap u wa em u yei sñiawdiaw lada ym yoh wow yachem man-i-por ya ki paidbah wa kiwa kyrchaan, neibhah wow yabeh cha ka Constituency man-ka-tayaw ym man iwa suk.
U Dasakhiat da ong u leh wa maya u ya ka Mawhati, wei wow haram ya katai ka Constituency kawa da pynjop nyngkong ya oo kam u MLA man ko i pap, heiwa da pyntip daw pynyakhun u na Mawhati da u bru uwa rap jan wei uwa man tre chnong neibynta i chakri wa rap bha wei uwa myntoi ya ka Constituency.
Hajrong i lai yakhun noh na Nongkrem, da ong u wa ha Nongkrem da em chwa ki lok kiwa kwah yah luti ya oo neibynta wow mihkhmat na katai ka Constituency. Hawa kylli, u Dasakhiat da ong u wa em i kyrmen wow jop na Nongkrem Constituency hanla dang man u u bru uwa dang thymme, tangwa hap u wow kreh chitom wow yoh yei chaniah wa i maya ki paidbah, neibhah wa toh ka yakhun wei ym toh iwa suk.
U General Secretary ka NPP Mawhati Block, u Donboklang Kharnaior da pynsñiaw u wa kam kiwa kreh ha ka Party, ki em ki yei sñiaw budnood neibhah da ya krehlang neibynta i pynbha pynbiang ya ki paidbah ka Constituency. Da ong u wa i lai u Dasakhiat cha Nongkrem ym ye u khang tangwa da e ki deilang wa i kyrkhu, heiwa da pynsñiaw u yei yooluti wa u Dasakhiat u emlang bait u wa ki paidbah ka Mawhati.
