U Vincent H. Pala, MP ka Lok Sabha na Shillong uwa man leh kam u President ka Meghalaya Pradesh Congress Committee, ynne ka sngi da pynbna paidbah u wow yakhun Election MLA naka Sutnga-Saipung Constituency ha u snem 2023.
Da ong u wa i kaam MP leh man ko kawa sñiawsuk, tangwa neidaw wa yoo wa ki bru da yoobeiñ ki ya ka Party kamtæ da rai u la kammon kammon da idæ hi u pynyoo nongmuna u wow yakhun ya ka Election.
Kamwa man katni da boonkaam bha u neibhah wa hap u yabeh kylleiñ kylleiñ ka jylla yow pynchna ya ka Party wei neini kamwa chi bnai u sah u haka Constituency yong oo hi.
Ya kini ki kyntien da klam u haka yalang pdiang burom ya u Emlang Laloo kam u kyrtong ka Congress naka 1-Nartiang Constituency deilang wa kiwi ki dkhot yong ka Nartiang Congress Block Committee, ha Mission Community Hall Namdong.
Hawa kyruiñ u cha ka sorkar wa katni da ong u wa i piah hapyrdi ka UDP wa NPP da sdang wei daw rap joor ko neini chakhmat. Tangwa ka Congress nadooh katni da sdang ko wow pynchna ya iyi wa da pra khnang wow suk heipor Election, deiwa kam leh wa heipor Election ka Congress daw phet ko 100 Km katwa ka UDP wa NPP won du 10 Km.
U Vincent Pala da kyrpaad u leh ya ki paidbah wow kyrchaan ya u Emlang Laloo uwa em i angnood wow chakri ya ka kaam paidbah.
Heijooh i por da kyntu u wym toh u artatien ya ka Congress neibhah wa ka lai luti da sdang ha kylleiñ ki thaw wei kamwa man katni ki kyrtong wow yakhun naka Congress toh kiwa biang pura suda neibhah kynthup ki nadooh ki Doctor, ki Engineer, ki Lawyer, ki sahep wa kiwi kiwi.
Da kynthah u leh yaka sorkar wa katni deiwa pynbaad wym leh ko iyi iyi neibynta wow booh ki Rehab Centre wow yarap ya ki bru wa ngat hei dih pynmuaid wa boon jait, najrong wa ka jylla Meghalaya toh kawa paawnaam hei puræ puthi da pynman noh ya ka kam ka thaw yakhle, neibhah dang ini wadep da mynjur ya ka aiñ.
Hawa yatoh waka juk wa katni da ong u leh wa da duna i chaniah haka Party neibhah hadien wa da ksoh ki ya ki kyrdan wa rap heh hapoh ka Party da chah thied noh ki, kawi wa sñiawsuk won u toh dei wym ye u thied ha kini ki sngi ya kiwa dooh.
Haka yalang pdiang ya u Emlang Laloo da emlang leh u Charles Marngar MDC Mawhati, u Vice President ka Meghalaya Pradesh Congress Committee, u Nehemayah Tyngkan, u Rikut Parieñ, Secretary District Congress Committee wa kiwi haka yalang wa pynlai da u Elias Susngi President Nartiang Block Congress Committee.
