U President ka Hynniewtrep Youth Council (HYC), u Roykupar Synrem da ong u wa i chah pynngat Case kiwa yahkhmat ka seiñ toh neidaw ka seiñ da chim ko ka luti wow pyndooh jait yei drugs.
U Roykupar uwa da lai hajir cha Sadar Police Station ynne ka sngi, da synraan lang leh da ki phaw ngut ki dkhot, wei i chah khut hajir u toh hajrong i khyndang ya ki yung wa da suba wa da chna pyrchah aiñ da kiwa wiar chnong ha Lum Survey, iwa da leh ka seiñ ha ka 23 tarik uni u bnai.
Da kam u leh wa ini wa chah khut hajir u toh wa ka poisa wa pynlai yaaw yei drugs toh kawa boon bha wei kiwa khayi drugs u thooh laad ki boon jait kammon wow pynngat ya ka seiñ ha ka aiñ. Heijooh i por da ong u wa kitu kiwa da ngop hei drugs, neiliang ka seiñ u yah ko ki cha ki luti wa biang, wei ya kitu kiwa pynlai yaaw yei drugs, ka seiñ ym e laad ko wow khayi ki deiwa suk.
Chooh chooh da ong u wa ym em sñiaw u iyi iyi yei chah pynngat Case u ha ki pulit deilang wa kiwi ki dkhot ka seiñ yeiwa da leh ki ha Lum Survey neibhah ini man ko ka lai luti yow pynyoo wa emlang ki ha chrooh ki paidbah wei ym tieñ ki ya kam kini ki Case.
Ki pulit da pynngat ki ya ki dkhot ka seiñ wa kynthup nadooh u President, Vice President wa u General Secretary hapoh ki kyndon 452/427/461/143/144/145/147/148/149/151/152/153A/ 506/1208 ka IPC neitæ ka kyndon 6/8 ka aiñ MMPO Act wei lada ym wan hajir ki daw chah kem ki katkam ka kyndon 41 A (3) wa (4) ka CrPC.
Discussion about this post