U Nidamon Chullet da e FIR kylla u hadien wa chah e FIR u ha u Selfdenial Lyngdoh deiwa chah pynbaad wa wan maham bru wei pynkulmar u ha chnong Kyndongtuber ha ka 25 tarik heiwa da maham u leh ya kiwa kyrchaan ya u kyrtong ka Congress, u Richard Lyngdoh na ka 3-Raliang Constituency.
Ha ka FIR u Nidamon wa da e ha Phramer Traffic Cell ynne ka 27 tarik, da pynche yeiwa jia ha ka 25 tarik deiwa ong wa ha katai ka miet heipor kamwa 9:40 da pyntip cha oo wa uwa emyatoh u uwa tip kam u Luckystar Ymbon da chah ksoh ka kari u ha Kyndongtuber da ki bru wa thmu wow lute oo, wei mar ya tip u yeini da lai hiar u cha ini i thaw wa jia heipor kamwa 10:30 ha katai ka miet yow lai pynlait ya uni uwa emyatoh u; uwa da lai won wow ujor FIR pyrchah ya ki le ngut wa kiwi de ki bru wym tipmit u kiwa na Kyndongtuber.
Ha ka FIR da ong leh wa hadien ini won, u Selfdenial da lai ujor FIR u deiwa pynbaad wa da lai saam poisa wei lai maham bru u Nidamon ha katai ka miet heipor 10:30.
Kamtæ u Nidamon da ong u wa ini i pynbaad ya oo toh iwa chna thok suda yow murieh ya ki kaam pyrchah aiñ u Selfdenial neibha deiwa wan e FIR u pynyoo wa oo toh uwi na kitu ki bru wa ksoh ya ka kari u Luckystar wei da pyrchang ki wow lute oo.
Hajrong ini, u Nidamon da kyrpaad u ya ki pulit wow e Case ya u Selfdenial wa da thmu u wow lute bru kamjooh wa da pynbaad u deiwa pyrchang wow pynbood naam ya oo.
Puræ leh: Chah ujor u Nidamon Chullet hadien wa maham bru wei pynkulmar u ha Kyndongtuber
