Ka Jaiñtia National Council Khliehriat Circle da lai booh ujor ko ha u Branch Manager ka HDFC Khliehriat Branch hadien wa da yoh ki ujor na kiwa boon walang wa ka HDFC da pynsepai palat ko yei por yong ki paidbah manda lai yaleh ki yow chim ram namo ka Loan.
Katkam ki ujor wa yoh na ki paidbah, da ong wa hadien wa dadep wow pynbiang lut yeiwa emkaam katkam wa phah ka Bank wei hadien wa dadep wow booh yei por i tarik wow pynlait noh ya ka Loan tangwa iwa sñiawsih won wa manda poi itæ i por, ka Bank da e daw ko deiwa boonjait wei heithaw wow yoh du hapoh kattu katni por, da chimpor hadooh 5-6 bnai wei ini da ktah bha ko khamtam ki pli ki bru kiwa wan na jngai chnong wei da ktah ko leh yei por yong ki heithaw wow smat dep yeiwa emkaam da man pathan iwa sahteiñ.
Ka JNC Khliehriat Circle lyngba u Publicity Secretary, u Symboh Sumer da ong u wa ini i rukom leh ka Bank da pyndooh kyrmen ko ya ki bru khamtam ya kiwa sdang u seiñ khih kamjooh kiwa emkaam hei puræ puthi, neibhah ha kini ki sngi ki Bank man ki kam kiwa pynyoh mynsien deiwa yarap poisa wow leh ya kawon kawon ka kaam, tangwa manda leh ki Bank kamni da ktah ko chiboon yei sñiaw ki paidbah.
Da ong leh wa da phylla wa heipor wa yaleh da ong wa khian bha ka sut namo ka Interest Rate tangwa manda dep lut i kaam da ong won wa da ku ka Interest Rate deiwa e ki daw kiwa boonjait.
Ha i ujor wa e kti cha u Branch Manager, ka JNC da kyntu joor ko wow pyndooh pyndam noh chisiendon ya ini i rukom krehkaam wei wow e i kti tidiang timun khnang wow myntoi ym du ya ki paidbah tangwa ya ka Bank leh.
Heiyatoh wa kani ka kaam da phah leh ya ka ujor cha u Deputy Commissioner ka East Jaiñtia Hills neibynta u tip wei wow leh u ya iwa emkaam.
Discussion about this post