Ujor PIL ki ar ngut ki khynroo wow pyrchah yei kyrriah ya ka C&RD Block na Wapung cha Lumshnong

Jowai: Ki arngut ki khynroo na East Jaiñtia Hills u Dame Wanhi Rymbai na Moolamylliang wa u Libas Siangshai na Wapungskur da ujor ki da ka PIL pyrchah ya ka sorkar jylla yeiwa kyrriah ki ya ka Wapung C&RD Block cha Lumshnong deiwa ong wa ini da tyngkheiñ ko ya ka riti synchaar (Constitution) ha ki artylli ki kyndon (Article) 14 wa 21.

Kiwa ujor PIL da ong ki wa hapoh ka East Jaiñtia Hills kawa da pynkha ha ka 31-07-2012 da em artylli ki Block kitæ toh ka Khliehriat Block waka Saipung Block wei ki bru wa em hapoh kani ka District da em ki 1,22,00 ngut.

Ha u snem 2014 ki bor District da ong ko wa ki 109 tylli ki chnong wa em hapoh ka Khliehriat Block da chim ki ya ka rai wow kyrriah noh ya kani ka Block cha Wapung wei ki ar chong ka Wapung Skur waka Wapung Chnong da e thaw mynkna lang ki wow chna ya kani ka Block thymme.

Kani ka thaw thymme toh kawa jngai du kamwa chiteiñ Kilometer na u sarokbah NH-44 wei em leh ka sarok PWD kawa biang wow poi cha kani ka thaw wei kani ka thaw leh em ko leh ka yaaw kamjooh ka Bank ka Meghalaya Rural Bank.

Related posts

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Ym pynyieñ kyrtong MDC ka KHNAM na JHADC

November 28, 2024

Kamtæ u DC ka EJH da phah u ya ka bui (Report) cha u Principal Secretary ka sorkar Meghalaya, Community & Rural Development hei yatoh wa ini.

Haka 07-11-2016 da ebor da u lat ka jylla wow kyrriah noh ya ka Khliehriat C&RD Block cha Wapung.

Hadien wa pynbiang lut ya ki kot ki sla da sdang u chna ya ka yungkrehkaam kani ka Block thymme wei i thaw ha Wapung em i kamwa 50 Km na ki chnong wa jngai dooh wei man ko ka thaw wa biang ya waroh da ong ha ka PIL.

Da ong leh wa hadien i krehchitom wa 4 snem yong ki paidbah wei i sñiawkmen mynsien wow yoh ya kani ka Block, ka sorkar jylla ha ka 09-01-2018 da pynbna won ko wa da kyrriah ya kani ka Block cha Lumshnong.

Kiwa e PIL da ong ki wa ym em iyi  iyi leh i sylli wa i thooh bniah chwa wow kyrriah ka sorkar ya ka Block cha Lumshnong wei hadien wa pynsñiaw ki paidbah yei pyrchah ki yeini u Montri Rangbah ka jylla u Dr. Mukul Sangma da pynche u wa ya ini da leh neibynta ki paidbah tangwa kiwa e PIL da kylli iyi i daw wa 5 snem nachwa ym em leh u ya ini.

Kamtæ da kyrpaad ki hakhmat ka Meghalaya High Court wow pynyoh ko yei hok ki paidbah.

Daw chong bichaar ya kani ka mukotduma hadien ar tayaw.