Ka Meghalaya da pteiñ ko yei jop ha ki yalehke ka Vijay Hazare Trophy deiwa pynrem ya ka Mizoram da 19 Run ha Jaipur ynne ka sngi.
Kani toh ka sien wa soo wa jop ka jylla ha kani ka Tournament ha kani ka samoi wei da yarap ya ini da iwa lehbha u Guest Professional Punit Bisht deiwa yoh 142 Run hadien wa ka Meghalaya da phah Bat nyngkong ya ka da ka Mizoram hadien wa jop ya ka kylla khlem.
Ka Meghalaya da hap ko wow khuslai ha iwi i bynta hadien wa yoh ko 65/5 hapoh 19 Over tangwa u Bisht wa u para Guest Professional Ravi Teja (42) da pynskem ki ha ki bynta wa pyrdi deiwa kamai 138 Run neibynta u Wicket wa 6.
Kiwa de kiwa Bat wa da yarap lang toh u Kishan Lyngdoh (20) wa u Lerry Sangma (11) tangwa ka Meghalaya da yarap boon u Bisht wow poi cha ka 237/10. U Bisht uwa man leh kam u Wicketkeeper da dat u 20 tylli ki 4 Run wa kawi ka 6 Run.
Ini toh iwa khian dooh i booh thong ka Meghalaya ha ki soo tylli ki yalehke wei da ye ko wow yada yeini deiwa ryntih kiwa kawang bol kiwa da e du 10 tylli ki Extra na ki 50 Over deiwa ye u ksoh ya ka Mizoram kawa yoh 218/7.
U Uday Kaul da tynjooh u ya ka Meghalaya deiwa yoh 109 Run tangwa kiwa boon wa wan Bat lang wa oo ym ye ki wow neh slem.
U Ram Gurung toh uwa lehbha na kiwa kawang bol deiwa yoh 2/26, katwa u Akash Kumar Chaudhary (2/57), u Aryan Bora (1/34) wa u Chirag Khurana (1/35) toh kiwi kiwa da yoh Wicket.
Ka Meghalaya kattu daw yachem ko waka Tripura ha ka 14 tarik.
