theme-sticky-logo-alt
theme-logo-alt
Advertisement ad1
Advertisement ad1

Wa da tikna wa daw em biang i tympdung bomb ha Shillong, kamtæ ki pulit da lai ki wow kem: Conrad

Advertisement ad1
Advertisement ad1

U Montri Rangbah ka jylla, u Conrad Sangma hawa yaklam wa ki laad pathai khubor ynne ka sngi, da khana u wa mar ya liwan u na Delhi da yaklam u wa ki heh pulit ka jylla heiyatoh wa i tympdung bomb ha East Jaiñtia Hills wa ha Laitumkhrah, Shillong ha kini ki sngi wa da dep wei hajrong kini ki kaam da yoh wow kem ya kiwa boon ki bru.

Da ong u wa hadien iwa jia ha Laitumkhrah, neiliang ki pulit da pynjoor ki yei takit, heiwa ki pulit da yoh ki ya ki sabut wa tikna yei emkti kiwa boon wa kynthup ya uwa khlaad ynnin ka sngi.

Advertisement ad1

Da khana u leh wa da yoh yutip wa tikna wa daw em biang i tympdung bomb ha kini ki sngi ha Shillong wei ya ini da pyntip leh da kiwi ki chnat ym du ki yong ka sorkar jylla. Hajrong ini ki pulit da rai ki wow lai smat chakhmat yow pyntikna wa ym jia de kam ini ha Shillong kamjooh ha kiwi ki bynta ka jylla wei ym em i thmu ki pulit wow pynmynsoo ya uwon uwon tangwa da jia ini wa sñiawsih.

Da ban joor u leh wa i thmu toh du wow kem donhi ym toh wow leh da iwi tawan, wei ki pulit leh ym em ki i thmu wow pynmynsoo chynnam ya kiwon kiwon.

Da khana u leh wa da biang ka sabut wow pynyoo leh heiwon wow leh ya ini i tympdung bomb tangwa ym pu man u khana kattæ neibhah lada pyntip chwa daw ktah wei daw pynsepai ko ya ka takit, wei i leh ki pulit da leh ki ya ini yow khang wow jia i tympdung bomb.

Da pyntip u leh wa u SP da e u ya ka Report katkam wa phah da ka National Human Rights Commission hapoh 48 kynta wei hadien ini daw booh da ka Magisterial Inquiry.

Da kyrpaad u leh ya waroh yow pynneh yei suk i saaiñ neibhah wa iwa leh ka sorkar wa ki pulit toh neibynta i bha i miat ka jylla.

Da ong u leh wa ka sorkar Meghalaya wai ko ki laad wow yaklam yasuk ya kiwon kiwon tangwa toh u man ko katkam ka riti synchaar ka ri wei ym toh u leh ya ki kaam pynmynsoo wei wow wan chakhmat khlem booh kyndon, hadien wa wan chakhmat ye wow yaklam ya ki kyndon tangwa chwa wow wan yaklam te booh chwa ya ki kyndon ym toh iwa ye u pdiang.

Hawa kylli, u Conrad da ong u wa da dep yoh ki ya ka chithi haka 16-01-21 wei hadien wa yoh ya ka chithi da yaklam boonsien hapoh ka sorkar jylla wei hadooh ka sorkar India heiwa da dep yaklam la arsien hajrong kani ka chithi wa phah da ka HNLC heiwa ka sorkar India da kdaw ko wa em ki kyndon wa da booh kiwa ym ye u pdiang da ka sorkar India kamtæ hap ki wow e da kawi ka chithi kawa khlem booh kyndon hajrong ka Stand Still Agreement waka Instrument of Accession.

U Conrad da ong u wa da pyntip cha ka HNLC ya ini heiwa da bait ko wow phah biang ya ka chithi kawa khlem kini ki kyndon tangwa kani ka chithi ym em poi ko, wei da ptieñ ki ya ki kaam pynmynsoo. Kamtæ ha iwi i liang kwah ki wow klam yasuk tangwa ha iwi i liang da leh ki da ki kaam pynmynsoo.

Share this:
Previous

Chah dat moo kawi ka kari pulit ha Jaiaw

Next

COVID-19: Da tam 54 klur sien wa da dep e tika hapoh India