Wa joor i kyllooh ka chuki u CEM ka KHADC lai yachem u Pynshngain ya ki heh ka NPP wa HSPDP

Shillong: Ka droma saiñ pyrthai ha KHADC da khih bha ko ynne ka sngi hadien wa ka liangpyrchah wa ki dkhot ka liangsynchaar da yakhih ki wow pynhaap noh ya u CEM u Pynshngain N Syiem neidaw wa ki pynbaad ki wa leh embor u wow pynemkaam bakla ya ka poisa ka Council kawa hadooh T. 28 Klur khamtam chwa ka Election MLA wa dang dep.

Neidaw wa da sñiaw u CEM wa da kyllooh ka chuki yong oo, ynne ka sngi da lai yachem u ya kiwa yahkhmat ka NPP kamjooh ya kiwa yahkhmat ka HSPDP ha Secretariat wow kyrpaad ya ki wow e ki ya ka kyrchaan ya oo ha kani ki Executive Committee ka KHADC.

Ynne ka janmiet da yoo wa u Pynshngain da lai yachem u ya kiwa yahkhmat ka NPP u Prestone Tynsong wei kamjooh ya u MLA ka HSPDP u Samlin Malniang.

Da yoh yutip wa u Pynshngain da kyrpaad u na kini ki arngut wow kyrchaan ya oo ha KHADC wei da e yumut u leh wow chna da kawi ka sokrar synrop kawa thymme ha KHADC hadien wa de em i kylla hapoh ka sorkar jylla.