Shillong: Hadien wa mih lut kiwa yahkhmat ka BJP khamtam ha Garo Hills, ka BJP da chna thymme ko ya ki tnat waphær waphær ha Garo Hills waroh kawi wa kynthup ya ka Ri-Bhoi District.
Kam wow pynkynmoo ha ka tayaw wa da dep ar ngut kiwa mihkhmat ka BJP wa kynthup ya u President ka Tura City District President, u Bernard Marak wa u President ka North Garo Hills, u Nachu Marak da mih noh ki naka party hajrong i yurim wa pynbaad wa ka BJP ym em burom ko ya ki paidbah ka Garo Hills.
U President ka BJP Meghalaya Unit, u Shibun Lyngdoh da kam u wa i yut seiñ yong ki ym ktah ko heiwon iwon leh ya ka Party neidaw wa da dep chna thymme ya ki tnat ka seiñ wei da jied leh ya kiwa mihkhmat wa thymme yong ki.
“U Bernard Marak da sñiawthooh wa daw chah hajir u ha ka party neibhah wa ym ye u wow e ya ka thup pyrtuid kiwa kitkaam wei wow pynche ya ki kaam yong ka party neibhah oo da leh u ya ki kaam pyrchah party wei da mih u chwa wow chah khut hajir ya oo,” ong u Shibun.
U President ka BJP u Shibun da ong u wa hei chna thymme wow pynkhlan ya ka party ha Garo Hills, ka party da thung ko kam u President u Rakesh Marak yong ka East Garo Hills, u Pesath Sangma yong ka West Garo Hills, u Dillash Marak yong ka Tura City District, u Paul R Marak yong ka North Garo Hills, u Ananda Koch yong ka South West Garo Hills.
Nalor kini, ka party da ekti ko leh ya kiwa pait ya ka Tura City ha u Edmund K Sangma, ya ka East Garo ha u Rikman Momin, ya ka West Garo Hills wa kynthup ya ka Tikrilla, Phulbari, Raksamgre ka Rajabala ha u Dr. KC Boro katwa ya ka Selsella wa ka Dadengre da ekti wow pait da u Parmod Koch.
U Shibun da ong wa ya ka South Garo Hills u pait u Santosh Marak, ya ka South West Garo Hills da u Premananda Koch, ya ka South Garo Hills Santosh Marak, ka North Garo Hills da u Digros D Shira wa u Md. Sofior Rahman kam u President ka Minority Morcha.
Ha Ri-Bhoi District da ekti ha u Ban Buhai Makdoh kam u President.
Discussion about this post