Jowai: Ynnin i step heipor kamwa 9:30 hadien wa joor syndet u slap, i bynta yong u sarok Pasyih-Garampani ha Shangpung Moosyiem da oor u.
Uni u sarok toh uwa pynyabi ya ka Jowai wa ki chnong hapoh ka Laskeiñ C&RD Block wot hadooh ki chnong khappood wa ka jylla Assam.
Hadien wa oor uni u sarok neiliang ki bor sorkar wa ki bor pynlai chnong da hap khang ki ya uni u sarok wei da pynlai noh ya ki kari na Moosyiem lyngba ka Shangpung Mission wei wow mih ha Shangpung Moolibang.
Hawa yaklam wa u Waheh Chnong ka Moosyiem, u Lewatki Suchiang da pyntip u wa pyn ynnin hadien wa jia ini da wan pait u MLA ka thaaiñ uwa man leh u montri ka sorkar jylla u Comingone Ymbon, da lai pait u ya ini i thaw chirup wa ki sahep ka chnat PWD.
Ini i oor u sarok da antaad wa jrong u sarok kamwa 50 meter (dei kynriñ) wei kamwa 20 meter (i pynyieñ).
Hawa yaklam wa ka sahep SDO ka chnat PWD Shangpung Sub-Dvision, ka A Sumer da pyntip ko wa mynstep daw wan ki heh ka chnat na Shillong wow pait ya ini i oor wei du hadien itæ daw ye u antaad yei lut wow chna biang. Heijooh i por da ong ko wa ympu ye u tip nadooh mynnu u sdang i kreh namo mynnu u dep neibhah wa daw pynkhreh ki ya ka bui (report).
Ini i oor uni u sarok da ktah bha i ya i lai i wan ki bru kiwa pynemkaam ya uni u sarok man ka sngi.
Discussion about this post