Jowai: U Montri ka chnat puræ puthi ka sorkar jylla u Lahkmen Rymbui hadien wa yoh yutip u yei oor i kynroh yong ka skur Govt. Boys Higher Secondary School Jowai wa em ha Chutwakhu, kawa da ktah joor ya 4 tylli ki yung nalor wa booh ko leh yei ma yaka yung skur yong ka kyrdan Higher Secondary kamjooh ka top um PHE wa em ha kani ka thaw. Ynne i step smat smat da wan lipait li sylli u ya kani ka skur hei emlang u Director ka chnat puræ puthi u Ambrose Marak, ka Almo Parisha Syiem Principal yong ka skur Govt. Boys kawa In-charge leh kam ka DSEO West Jaiñtia, u Lyngkor Kynjing MCS wa kiwi kiwi ki bru yong ka chnat puræ puthi nalor ki bru waheh yong ka Chutwakhu.
Hei yaklam wa u Lahkmen Rymbui da ong u, i wan lipait yong oo ynne ka sngi toh yow pyrkhat iyi wow leh khnang wa kani ka thaw u lait ko nei chahktah, heijooh i por leh kammon u pynyoh i yada khnang wa kam ini i jia wym jia de chakhmat neibhah kani wanrah ko yei dooh nong yaka sorkar waki bru wa sah marjan.
Khana haroh u kamwa man kattæ hap pyrkhat chwa neibynta u pynyoh ki laad yada wa chipor khnang wa lada jia wow pteiñ u slap leh ka khyndaw ym oor de ko, katwa neibynta i yada wa paka won ye u leh hadien wada kut u slap dei wow chna yaki kynroh wa skem. Heijooh i por leh kyrmen u wa ini i jia u man i iwa khaddooh.
Heiyatoh wa ini, ong u wa daw yaklam leh waka chnat PHE hajrong kammon u leh ya kani ka top um wa em ha kani ka thaw. Hanla wot yaka um wa em ha katni ka top da pynsngad ynnin leh, daw pait wei bichaar bniah chooh chooh wa man hi mo iwa chngaaiñ wow em ko ha kani ka thaw.
Ha kani ka jooh ka sngi neiliang ka chnat PWD Road leh da sdang ki wow pynkhooid yaki khyndaw wada ban lut kut ya u sarok deiwa wanrah yaka pooh chiloom wa ki truk wa kit khyndaw.
Discussion about this post