Ynne ka sngi u montri ki kaam pohyung ka sorkar pyrdi, u Amit Shah chirup wa u montri rangbah ka jylla, u Conrad K. Sangma da wai u ya ka “Greater Sohra Water Supply Scheme” hei emlang u montri ka chnat DoNER u G Kishan Reddy, u Motri khynnah ka DoNER u BL Verma wa u montri khynnah ka Science and Technology u Jitendra Singh, kamjooh u montri ka chnat PHE, u Renikton Lyngdoh ha Sohra, East Khasi Hills.
Ka Greater Sohra Water Supply Scheme toh kawa da chna da i yoh yarap poisa na ka Ministry of DoNER hapoh ka NESIDS yong u snem 2019 ha i lut wa T. 24.08 klur heiwa daw pynpoi um ko ya ka Sohra wa ki 12 tylli ki chnong wa kynthup ya ka Sderkariah, Khlieh Shnong, Maraikaphon, Pdengshnong, Nongrim, Pomsohmen, Nongsawlia, Mawkisyiem, Saitsohpen, Mawpunkyrtiang, Pynshadkhurai wa Kutmadan deiwa wanrah ya ka um na Wah Lyngksiar wa Law Sanlait heiwa daw yoh myntoi ki 22,943 ngut ki bru.
Neiliang u Amit Shah da ong u wa kani ka Project man ko kam ka thong u montri rangbahdooh ka ri, ya kawa tip kam ka Jal Jeevan Mission, heiwa ka Ministry of DoNER wa ka sorkar Meghalaya hapoh yong ka North-East Special Infrastructure Scheme kreh ki neibynta kani ka Greater Sohra Water Project ha i lut wa T. 25 klur.
Da ong u wa lada ka um ym man ko kawa khooid kamtæ ki paidbah leh ym chait ym khlan ki kamtæ wow pynpoi um cha waroh ki manyung ka Meghalaya toh ka thong wei u man ko leh kam chibynta yong i dap laitlooid ka ri wa 75 snem kamjooh leh 50 snem ka Meghalaya.
Da booh thong leh wa hapoh kani ka kreh daw ye wow pynpoi umdih cha waroh ki 2,80,000 tylli ki manyung hapoh ka jylla heiwa daw em 1874 tylli ki kreh (Project) wa khian.
