Hadien wa ka Dorbar Chnong Nartiang, West Jaiñtia Hills da dooh noh ko ya ka Yung Dorbar la 13 snem, ynne ka sngi u CEM ka JHADC, u Thombor Shiwat da wan wai u ya kani ka yung ha ka yalang wa tbian ya kawa da pynlai da u Donkhian Phyllut uwa man u Symbood Waheh Chnong ka Nartiang.
Da yoh ya ki kyntien pdiang burom na u General Secretary ka Dorbar Chnong Nartiang, u Sati Swer, wei da yoh i klam leh na u Waheh Chnong ka Nartiang, u Mom Phalangki heiwa da batai u kammon da lai luti wow kreh ya kani ka yung hadooh wa da pyndep ya ka.
Da yoh leh i kyntien na ka B. Blah kawa man ka BDO ka Thadlaskein C&RD Block heiwa da yaroh ko ya ka Executive Committee ka chnong hapoh i yahkhmat u Waheh Chnong heiwa da yoo sakhiat yei mynsien kreh chitom ki, wym toh du kat ya kani ka Yung tangwa wot wa da lai bait i kreh mylla 100 sngi hapoh ka VEC Nartiang.
Ya ki kyntien khublei da e da u Abipaia Bareh, Secretary ka VEC Nartiang.
Ya kani ka yung da pynkreh lyngba ka MLA Scheme ha i lut wa T.3,00,000, ka MP Scheme T. 5,00,000, MDC (SAG) Scheme T. 13,00,000 wa na ka yarong poisa yong ka Dorbar Chnong.
