Wai u Conrad Sangma yaka Website ka kchaaid Krangshuri

Jowai: U montri rangbah ka sorkar jylla u Conrad K Sangma ynne ka sngi da wan wai paidbah u ya ka Website yong kawi naka thaw uiñke suwari wa pawnaam ha ri-loom Jaiñtia kawa da tip pyrtuid da ki ar tylli ki ktien “Krang” wa “Shuri” iwa mut “Krang” i krem katwa “Shuri” iwa mut won wa ha kani ka krem da jooh booh ya ki wait ki soom ha ki por yong u syiem Jaiñtiapur.

Kani ka kchaaid Krangshuri kawa em ha Amlarem Civil Sub-Division, West Jaiñtia Hills District toh kawa pynlai da ka Raij Buam Environment Protection Association wei ha kini ki snem kiwa da lai da pawnaam bha ko heiwa da wan pait ya ka na kylleiñ ka ri kamjooh na baar ri wei kamwa man kattæ 500 ngut ki bru da yoh kaam ki na kani ka kchaaid.

Kamtæ i pawnaam kani ka kchaaid lyngba i krehlang ka Raij Buam Environment Protection Association wa ki bor District ka West Jaiñtia wow pynmiat pynbha ya kani ka thaw, ynne ka sngi da wai ya ka Website www.krangshuriadventuretours.com da u Conrad Sangma hei synran da ki ar ngut ki montri ka jylla u Lahkmen Rymbui uwa pait ya ka chnat puræ puthi wa u Sñiawbhalang Dhar uwa pait ya ka chnat C&RD, nalor kiwi ki chnat sorkar.

U Conrad Sangma hawa e yei klam da ong u wa ka kaam uiñke suwari man ko kawa emkaam bha kawa ye u wailaad yow yoh kaam yoh jam wei heijooh i por wow yada wow pynneh pynsah kamjooh wow yada yei bha i miat ki soodong sookun.

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Da ong u leh wa ka ri-loom Jaiñtia kawa da kyrkhu kyrpang da ka bei rymaw ye ko u taan ya kiwa uiñke suwari na kylleiñ ka ri, da pyntip u leh wa neilaing ka sorkar da em ko ka thong wow pynku ya kani ka kaam wei da mang ko wow pynlut T. 22 klur lyngba ka Central Scheme.

Neilaing u Lahkmen Rymbui da ong u wa ka kaam uiñke suwari toh kawa yoh myntoi dooh khamtam cha ka thaaiñ yong i kawa da em boon ki thaw wa da pawnaam kam ka Shnongpdeng, Dawki, Krangshuri wei da yoo wa i wan tooid ki bru dang ku i na ki por cha ki por wei iwa emkaam katni toh wow pynneh wow sumaar bha ya kini ki thaw wei kammon wow pynmih poisa na kini ki thaw.

Katwa u Sñiawbhalang Dhar da ong wa ka kaam uiñke suwari nalor wa man ko ka laad kamai ka pyntipmit pyn pawnaam ko leh ya ki chnong ki thaw yong i, wei kam ki tre chnong emkaam wow em ki ka akor ka burom wow pdiang ya kiwa wan uiñke suwari wei wow pynbiang ya iwa emkaam ki.