Shillong: U montri rangbah ka jylla, u Conrad K Sangma ynne da wai paidbah u ya ka website Meghamart ha yung krehkaam u hei emlang u Co-Chair of Young Leaders Connect (YLC) 6, u Larsing Sawyan, wa kiwi ki dkhot ka YLC.
U Conrad K Sangma da ong u wa i wai ya kani ka website toh wow pynjanai yei rukom seiñ khih seiñ kreh hapoh ka jylla lyngba ka khayi pateiñ heiwa daw yarap ko ya ki bru wow tyrwa dai ya ki tiar wa pynmih ki.
Da ong u leh wa ka sorkar daw pynmih ko ya ka Procurement Policy khnang wa ki chnat sorkar kamjooh ki chipai wa ki bru samen u ye ki wow thied 20% na iwa emkaam ki na kiwa napoh jylla hi.
Ka meghamart.com toh ka website heiwa ki bru samen ye ki wow thap yei pyrtuid yong ki mar yong ki iwa man lyngba ka Institute of Entrepreneurship (MIE) hapoh yong ka thong krehkaam ‘Made in North East’ wa ‘Made in Meghalaya’ khnang wow yarap ya ki bru kiwa seiñ khih kiwa pynmih ya ki mar yong ki hi.
I kyntien imsngi ‘The Best of North East at your Doorstep’ yong kani ka website daw yarap ko chiboon ya ki bru napoh jylla wow pynlai yaw ya ki mar yong ki cha baar jylla heiwa kiwa thied ye ki wow yoh yutip chaphang kiwa dai weiwa daw ye ki leh wow thied bait na ki tre wa chna ya kini ki mar.
Discussion about this post