Wai u MLA ya ka yingkieñ kjat kiwa rep ha Shangpung, pynbna sa u sarok wa Rs.15 klur, ka kari kit jhep wa Rs. 25 lak

U MLA ka Raliang Constituency, u Comingone Ymbon, ynne ka sngi da wai u ya ka yingkieñ lai kjat ha Leichka Shangpung Pohshnong, West Jaiñtia Hills District kawa man ka yingkieñ ka wow yarap chiboon ya ki paidbah warep kani ka chnong neibynta u kaap na chiliang cha chiliang ka wah Umyuriem hawa lai rep lai riang ki khamtam heipor wa heh um.

Ya kani ka yingkieñ lai kjat da chna hei lut wa Rs. 49,98,700 lyngba ka District Rural Development Agency yong ka Office u Deputy Commissioner ka West Jaiñtia Hills District.

Ha ka yalang wai paidbah wa pynlai da u Heingeitmon Suchiang, Chairman Chnong Shangpung Pohshnong, da sakhilang da kiwa yahkhmat chnong ka Shangpung Pohshnong, kiwa yahkhmat ka Dong Leichka najrong ki paidbah wa chong chnong.

Neiliang kiwa klam wa kynthup nadooh u Waheh Chnong ka Shangpung Pohshnong, u Leadingstar Ñiang, u Shanborlang Dhar na ka Dong Leichka, u Dolloi ka Elaka Shangpung, u Chanki Langbang da yaroh ki yei kaam wa bha wa u MLA da wanrah u hapoh ka chnong Shangpung, kamjooh leh heiyatoh waka yingkieñ wa wai ynne ka sngi kawa man lyngba i yarap yong oo, heiwa neini chakhmat ki paidbah warep ym emkaam de ki u lai kjat da ki kynta yow poi cha ki thaw rep heipor wa heh um.

Kini kiwa klam da ban joor haroh ki hajrong i emkaam u man ki paidbah wa chong chnong kiwa yatylli ha kawon kawon ka kaam neibynta i bha yonglang ka imlang sahlang wa i roi i paar.

Neiliang u Comingone Ymbon hawa klam ong u kani ka wah Umyuriem wa chna yingkieñ lai kjat najrong yong ka toh kawa kongsan tam haka chnong Shangpung neibhah toh ka kawa psa umbaam umdih wei pyndap um ya ki paidbah ha waroh ki liang lada hei rep i riang kamjooh.

Kamtæ kyntu u ya ki paidbah wa chong chnong u pynneh pynsah ki yei khooid suba yong ka kamwa man ko ynne ka sngi.

Related posts

Da theh 9 Quintal ki dakha neibynta ka yakob khwe wa em palat Rs. 21 lak ki Prize ha Nongjngi Lumtrep

July 17, 2026

12 ngut ki koidi kiwa em hapyrdi 70 hadooh 80 snem i rta ha ki patok ka jylla

July 17, 2026

Ong haroh u wa i em kani ka yingkieñ ye ko leh u booh hei maa ya ki khynnah, kamtæ kyntu u leh ya ki manbei manpa wow sneiñ ya ki khon ki kti wym toh u wan lehke ha kani ka yingkieñ lait u jia iwon iwon wa sñiawsih.

Ha kani ka sngi u Comingone da pynbna haroh u wa da yoh ya ka mang poisa yow chna pynbha ya ki sarok hapoh ka Shangpung Pohshnong kamwa Rs. 15 klur, wei da yoh Scheme leh u thied kari kit jhep thymme kamwa Rs. 25 lak tam.