Ka Atal Tunnel kawa em ha Leh-Manali Highway ha Himachal Pradesh kawa da chna hei dor T. 3,200 klur da wai yaka ynne ka sngi da u montri rangbahdooh ka ri u Narendra Modi heiwa kani ka Tunnel daw pynduna ko yei jngai na Manali cha Leh da 46 km wei i lai luti daw duna da kamwa 7 kynta.
Kani ka Tunnel toh kawa jrong 9.02 km wei daw yarap ko leh wow yada ya u pood ka ri neidaw kattu da ye u lai cha ka thaaiñ Ladakh lad em ka yor leh iwa man katni ka thaaiñ wa da kynaad bha ka India waka China.
Ya kani ka Tunnel da chna deiwa chimpor 10 snem heiwa da em leh ka Tunnel yow ye u yut (Escape Tunnel) lada jia iyi iyi yaka Tunnel wa pynemkaam wei man ko leh ka Tunnel Highway kawa jrong dooh ha pyrthai kawa em palat 10,000 Ft na sla duriaw.
Ya kani ka Tunnel da chna daka Border Roads Organisation wei da booh ha ka ya iwa emkaam katkam ka juk wa katni heiwa man ka 1 km da em ki kor wa thaw yei khooid ka la-ær, ki Telephone man ka 150 Mtr, ki tiar siat tympleh diñ man ka 60 Mtr, ki Auto Incident Detection CCTV wow riñ lada em iyi iyi wa phær kiwa da booh man ka 250 Mtr wa kiwi ki Camera kiwa da booh man ka 60 Mtr.
Kani ka Tunnel toh kawa ye u psiah 3,000 tylli ki kari chi sngi wa 1,500 tylli ki Truck deiwa booh wym toh u pynhær kari palat 80 km/hr.
