U MLA ka Nartiang uwa man leh kam u Montri sorkar wa pait ya ka chnat Urban Affairs, Commerce & Industries wa kiwi de, deilang wa u Montri ka chnat PHE, u Renikton Lyngdoh Tongkhar da booh mooyurim ki ya kiwa boon ki kaam pynroi nadooh ka umkor, ki sarok wa kiwi de ha ka yalang wa pynman ha Mynsngat ynne ka sngi.
Ki kaam wa da booh mooyurim toh ka Moolyngkdein Water Supply Scheme hapoh ka JJM hei lut wa T. 11,43,00,000 kamjooh ya ka Mynsngat-Nongsutnga Water Supply Scheme hapoh ka JJM hei dor wa T. 5,35,10,000.
Da booh mooyurim leh yow chna pynmiat ya u sarok Mynsngat-Moorap-Mookjat ha ki bynta ki 7 chnong hapoh ka CRF 2021-22 kiwa jrong 40.532 Km.
Ha kani ka sngi da wai leh ya ka Iaw Muchai Mynsngat ka JHADC.
Da emlang leh ha kani ka sngi wa u Montri ka chnat PWD (Buildings), u Dasakhiatbha Lamare, u Wailadmiki Shylla, MLA Jowai, u CEM ka JHADC, u T. Shiwat, ki MDC ka JHADC nadooh u Eveningstar Tron, u Lakhon Dkhar, u Jesse Suiam, u Phasmon Dkhar wa kiwi sahep sorkar, ki waheh chnong wa na marjan ka chnong Mynsgat deiwa sakhi lang kiwa chong chnong.
Neiliang u Montri ka chnat PHE da yaroh u ya u Sniawbhalang Dhar wa da ye sakhiat u wanrah yaka roi ka paar hapoh ka Nartiang Constituency.
Neiliang u Sniawbhalang Dhar hawa e yei klam da kyntu u yaki paidbah wow em itæ i ya krehlang khnang u ye u wanrah yaka roi ka paar hapoh ka chnong ka thaw kamjooh hapoh ka Constituency waroh kawi.
Da yoh leh yei klam na u Dasakhiatbha Lamare, u Wailadmiki Shylla wa na kiwi tawon wei da pynphooh pynphieñ ya kani ka yalang da ki rwai na ki khon ka chnong Mynsngat.
