Wan pynyoo kiwa boon yei kyrchaan ya u Suni Bareh

Ka yalang wa da khut da u kyrtong MLA na Khliehriat, u Suni Bareh da man ko kawa lai bait kawa pynman ha Khliehriat Community Hall ynnin ka sngi deiwa em chiboon ki paidbah kiwa wan e yei kyrchaan heiwa ya kani ka yalang da pynlai da u waheh chnong warim ka Bataw, u Bhalang Suchiang.

Ha kani ka yalang da yoh leh yei klam tbian na kiwa boon ki khynroo wa ki waheh yong ka thaaiñ wei da wan wow e mynsien ya u Suni Bareh da u L. Dkhar uwa da kyntu ya ki paidbah wym toh wow pyndooh mynsien ya uni u khynroo wa em yei kitkhlieh wow wanrah yei kylla neibynta i bha i miat yong ka District wei khamtam ya ka 6-Khliehriat Constituency hi waroh kawi.

Neiliang u Suni Bareh da paan u yei kyrchaan na ki paidbah wei da pynsñiaw u leh wa ka thong kawa hakhmat wei wa da angnood sakhiat u toh wow wanrah ya ka College sorkar wei wow pynbiang ya ki thaw sumaar wei wow wanrah ya ka roi ka paar hapoh ka Constituency wei da paan yumut u leh na kiwa kyrchaan lada u yakhun na ka Party lane u yakhun kam u kyrtong samen heiwa ki paidbah da mynjur ki wow yakhun kam u kyrtong samen (Independent Candidate).

Kamtæ u Suni da ong u wa da angnood u leh wow wanrah ya ka roi ka paar ha waroh ki liang deiwa kyntu leh ya ki khon khynroo wa khyllood wow sñiawbha ki wow e yei kyrchaan yow poi cha ka thong jop.