U Montri Rangbah ka jylla, u Conrad K. Sangma chirup wa u Montri Rangbah ka Sikkim u Prem Singh Tamang ynne da wai ki ya ka Northeast Food Show ha Polo Grounds, Shillong hei emlang u Montri ki kaam rep u Banteidor Lyngdoh wa u Montri ka Sikkim u Bidu Singh Panth.
U Conrad K. Sangma da ong u wa ka Northeast Food Show da man ko ka rynsan ya kiwa seiñ kreh wa ki warep ka jylla kamjooh ka thaaiñ mihsngi wow chalan ya ki mar cha baar ri.
Ka Meghalaya chirup wa ka SIAL, da pynman ko ya ka tamasa ha u 2019 wei kani toh ka sien wa ar wa pynman ya ka heiwa da wanrah ya ki mar rep na kylleiñ ki ri ka pyrthai khamtam na ka thaaiñ mihsngi.
Da ong u leh wa kani ka tamasa toh ka yong ka thaaiñ mihsngi neibhah da wan ki bru na kylleiñ ka pyrthai wow thied mar wei ka Meghalaya samen ymye ko wow pyndap ya kini ki mar.
Chooh chooh da kdaw u ya ka ri Vietnam wa man ko kam ka nongmuna ya kiwi ki ri ha ki marbaam, heiwa da ong u wa ka thaaiñ mihsngi ka ri leh ye ko wow man kam katæ ka nongmuna wei emkaam leh yei yakrehlang heiwa da dawa ya kiwa seiñ khih wow wan ki chaphrang.
Heijooh i por da ong u wa ka Meghalaya daw pynman chooh chooh ko ya ka Northeast Food Show heiwa daw pynheh pynkmai chooh ya ka ha ki por wow wan.
Neiliang u Prem Singh Tamang da yaroh u ya u Conrad K. Sangma wa da sdang ya kam kani ka tamasa wow wailaad ya kiwa seiñ kreh wa ki warep ka thaaiñ wow wanrah ki ya ki mar yong ki.
Ka Sikkim leh da chimbynta ko ha kani na tamasa Northeast Food Show.
Ka thaaiñ mihsngi toh kawa da kyrkhu heiwa boon ki jylla ye ki wow pynmih ya ki mar rep wa har rukom wow wanrah ya ka ri chaphrang wa kiwi tawon.
Ha kani ka sngi da emlang u Pham Sanh Chau, Ambassador, Embassy ka Socialist Republic of Vietnam, u Ram Prasad Subedi, Charge d’Affaire, Embassy ka Nepal ha India, u First Secretary ka Embassy ka Japan ha India, u Ikko Watenabe, u Montri ka sorkar Sikkim, u Bidu Singh Panth, ka Chief Secretary ka Meghalaya, ka R V Suchiang wa kiwa mihkhmat ki sorkar kam ka Chile, Poland, Austria, United Kingdom, European Union wa kiwi kiwi.
