Jowai: U Nujorki Sungoh uwa man u MLA ka 4-Mowkaiaw Constituency ynne ka sngi da wai paidbah u ya ka Kisan Mela næ ka yaaw pynyoo rong ya ki kor ki bor næ ki Machine neibynta wow pynemkaam ha i rep i riang wa pynlai da ka yung krehkaam District Agriculture Officer, Jowai kawa haap hapoh ka Agriculture Engineering (Mechanical) Wing ha Chutwakhu Indoor Hall, heiwa da wan chim bynta da ki warep ka ri-loom Jaiñtia wa kynthup ka East wa West Jaiñtia Hills District.
Kani ka mela man ko chibynta wow pynsñiawthooh ya ki warep hajrong ki kor ki bor waphær waphær kiwa ye wow yarap ya ki haka rep ka riang neibynta wow pynsmat ya i kaam wa ye wow pynmih rap boon ki mar rep neibhah haka juk wa katni wow bood ya i rukom rep warim ym yahaap de i wei lyngba kani ka Mela ka sorkar pyrdi pynchlur ko ya ki warep deiwa e Subsidy wa rap heh neibynta wow thied ya kini ki kor.
“Sien pyrkhat lada thied ya ka kor daw rap syad dor ko, wei ha u snem rep wa nyngkong wei ki snem wa bood won lada wyrchaw yeiwa pynlut dei khoh dor yei bor bru nadong chadong man i iwa myntoi wa mih na i em kani ka kor,” da ong u P. Suting, AEE (Mechanical) SE Cum Joint Director (Mechanical).
Kamtæ da pynchlur u wow thied ya kini ki kor neibhah ha kani ka kynti daw yoh hei dor wa rap jem wei ka Subsidy leh kawa rap heh.
Neiliang u M. Thabah, AAE (Mechanical Wing), Jowai da pynche u ya i myntoi na ki kor ki bor wa ye wow chim na ka chnat krehkaam kam ki Power Tiller, ki kor ah kba, ki pooh chi loom wa kiwi kiwi neibhah lada chim na ki bru samen haap su hadooh 2, 3 hajar neibynta ka kor loor chi Acre katwa na ka chnat sorkar won man i du T. 500 chi Acre wei lyngba kani ka kabu da kyntu u wow chim ya kini ki tiar.
U Nujorki Sungoh kam u kongsan da ong u wa i rep i riang toh iwa kongsan tam ha ka imlang sahlang wei hapoh ka Ri India waroh kawi 70% kiwa chong chnong ha ki thaaiñ nongkyndong toh kiwa kreh ha ka kaam rep wei ymye mutdur hadooh katwon emkaam i rep i riang wei kitai ki 70% ye ki wow pynyoh baam, neibhah lada chim katkam i boon bru (Population) ka ri i boon bru ymtoh de iwa ke.
Kamwa man ha ki thaaiñ cheini dang boon kiwa bood yei rukom rep wa yah da u warim wei ym jooh yo yei yaphær ha ka rep ka riang, kamtæ da kyntu wow chim kabu ya kam kini ka laad wa wanrah da ka sorkar khnang wow pynku ya ka rep ka riang yow lait u chaniah ha kiwi tawon ki jylla.
Heijooh i por kyrmen u wa kini ki kor wa da mang neibynta ki warep u man sakhiat ki kiwa ye wow pynemkaam hok.
Kiwi kiwa klam kynthup ki ya u DAO Jowai, W. Marbaniang, DAO Khliehriat ka E. Suchiang, ka B. Majaw District Horticulture Officer, Jowai wa kiwi kiwi.
Discussion about this post