Shillong: Ynne ka sngi ha ka Dorbar Chna Aiñ ka sorkar jylla da wanrah ko ya ka Meghalaya Protection of Interest of Depositors (in Financial Establishments) Bill, 2018 wow yada ya ki paidbah na kiwon kiwon ki kaam chah thok kam ha ki Bank wa kiwi ki seiñ pynlang poisa.
Hawa wanrah ya kani ka Bill u montri rangbah, u Conrad K Sangma da ong u wa emkaam wow em ka aiñ wa khlan yow yada ya ki paidbah wa thap poisa ha ki Bank wa kiwi kiwi kiwa pynlang poisa kiwa krehkaam hapoh ka jylla.
“Ya ini da leh neidaw wa em hi ki seiñ wa pynlang poisa na ki paidbah kiwa ym em yohbor kiwa ye u thok ya ki paidbah wei wow pynchitom ya kam kini ki seiñ,” da ong u Conrad.
“Ka aiñ kawa da em katni ka Meghalaya Protection of Interest of Depositors (in Financial Institutions) Act, 2006 ym em man ko kawa biang wow yada ya ki paidbah na kam kini ki seiñ kamtæ da emkaam wow pyndam noh ya kani ka aiñ warim da kani ka aiñ wa thymme kamtæ da wanrah ya kani ka Bill,” da ong u montri rangbah.
Katkam kani ka Bill, ka sorkar ye ko wow chimkti ya ki yung krehkaam kini ki seiñ hei pyrtuid ka seiñ kiwa thied hei pyrtuid yong ki namo ki bru wa pynemkaam ya ka lada thok ki ya ki paidbah.
Ki tre ye ki u chah kset hadooh chiphaw snem wei wow su ya ka kuna wa chi lak wei ya ka seiñ namo ka Company won da haap su ki T. 2 lak.
Kani ka Bill da klam ko leh wa waroh kam kini ki seiñ wa pynlang poisa emkaam ki leh wow paan bor kamjooh wow tipmit ki DC ki District chwa wow ye ki u sdang u kreh hapoh ka jylla kamjooh u yoh bor na u SP.
Ki paidbah won kiwa chah thok ye ki u ujor yeiwa chah thok ki wei ya ka takit daw pynman da ka CID.
Ka sorkar leh daw booh ko da ki yung bichaar wa kyrpang wow pait du ya kini ki kaam.
Ha kani ka sngi da wanrah leh ya ka Meghalaya Essential Services Maintenance (Amendment) Bill, 2018, ka Meghalaya Societies Registration (Amendment) Bill, 2018 waka Supplementary Demands for Grants and Supplementary Appropriation ya u snem 2018-19.
Discussion about this post