Ynne ka sngi, u MLA ka Mowkaiaw, u Nujorki Sungoh da wanrah u ya kiwa boon ki mat ha ka Yung Dorbar Chna-aiñ ka jylla khamtam heiyatoh wa ka mang tangka wa da wanrah u Montri Rangbah ka jylla, u Conrad Sangma.
U Nujorki da ong u wa sñiawkmen u heiyatoh wa ki sarok cha ki thaw palatsor heiwa ka sorkar da wanrah ko ya ka CM Rural Connectivity Scheme wa da mang neibynta ki sarok cha palatsor kiwa ym tymmoh ka PMGSY.
Da ong u wa hanlada em chiboon ki surok wa da kreh hapoh ka MDA-I tangwa dang em ki chnong kiwa dang sah hadooh katni deiwa kyntu ya u Montri Rangbah wow phah ya ka PWD wow chna ya u sarok ha ki chnong kiwa ympu em sarok kam ka Moobandu, Madan Byrwai wa ka Umsalait.
Da kyntu u leh u chna ya u sarok na Khatkasla-Mowjem-Jarikyndeng u wow pynyabi ya ki chnong ha Block-I neibhah katni em u sarok khyndaw uwa ye u pynemkaam du da ki kari heh khamtam heipor lyur wei deiwa em uni u sarok daw pynsuk bha u ya ki paidbah ka thaaiñ khamtam hawa kit mar.
Uwi won u sarok na Madan Pohkseh cha Lakasein neibhah ka Madan Pohkseh haap ko ha West Jaiñtia katwa ka Lakasein won em ko ha East Jaiñtia wei wa phiah ya ki toh da kawi ka wah khian wei deiwa chna ya u sarok daw pynsuk bha i ya ki paidbah wei daw pynyabi ya kini ki ar District.
Heiyatoh won wa ki kaam khappood da ong u wa ka MDA da leh ko chiboon ki kaam ha ki snem wa dadep wei da kyntu u ya ka sorkar wow pynku ya ka yarong poisa neibynta khappood neibhah em boon ki chnong kiwa khlem umkor, khlem bordiñ, yung skur wa kiwi kiwi ha Block-I.
Da yaroh u ya ka MDA-I wa da chna ya kiwa boon ki skur wei emkaam u pynneh namo wow pynboon kamra ya ka Kiang Nangbah Government College khamtam ha ka Class XI neibhah man-u-snem da tam 1200 ngut kiwa wan thap pyrtuid wei kani ka College leh chem chitom bha ko kamtæ da kyntu u ya ka sorkar wow leh yeiwa emkaam hajrong ini.
Chooh chooh da kyntu u wow yarap pynheh ya ka Saw Lyngdoh Higher Secondary School wa kamjooh wow pynku kyrdan ya ka Laskein C&RD Block cha ka Sub-Division.
