Ka mukotduma PIL wa da yaleh ha High Court ka Meghalaya hadien wa em wa thoh ya ka chithi wow ujor cha ka yung bichaar heiyatoh wa ka wah Myntdu kawa da chah ktah deiwa chna sarok heiwa da phah lang wa ki dur wa kiwi de ki sabut yow pynyoo yeini. Ynnin ka sngi da chong bichaar ya kani ka PIL wei ka High Court da ong ko wa yoo khyrngiat yei rukom chna ya uni u sarok wa jrong 5.915 Km uwa nadooh Khliehtyrchi hadooh Treiongriang uwa man leh kam u Jowai Bypass.
Uni u sarok toh uwa da chna hei lut wa Rs. 9358.66 lak wei ka yung bichaar da ong ko wa katkam ka Status Report wa da yoh, ym em da khana bniah wei da yoo wa u Contractor kamjooh u Executive Engineer, PWD (Roads) ym em chimkhia ki wow pyrkhat yei chah ktah ka wah kamjooh kiwa em chajan hadooh ki lyngkha wa rep ki bru.
Da ong leh wa lait neiwa phah ya u Contractor wow leh u yeiwa emkaam yow yada, ka Report ym em khana bniah ko iyi iyi wei man ko du chi sla donhi wei ym em leh khana iyi wa da leh heiyatoh wa ini.
Ka High Court da ong ko wa ini wym em i mynsien wow kithlieh hawa pynkreh deiwa khlem yada ya ka ramaw, waroh kitu kiwa embynta wow leh yeini daw hap ki wow bahkhlieh hawa bichaar ya kani ka mukotduma.
Neiliang u Advocate General ka sorkar jylla da paan por u yow e jubab deiwa rap bniah khamtam kammon wa da yoh yei thaw yow chna ya uni u sarok wei lada leh namo ym em ya ka Impact Assessment yow tip hadooh katwon wa ye u chah ktah.
Da pyntip u leh wa katni dang pynkhooid yow moo, i khyndaw wa mih nei chna ya uni u sarok wei da chna leh yeiwa emkaam yow lait u poi khyndaw cha ka wah.
Kamtæ da e por ar tayaaw yow phah ya ka Report wa bniah.
Discussion about this post