Shillong: Ka Meghalaya da jop ko yaka yalehke wa san yong ka kawi hadien kawi haka Women’s Senior One-Day Trophy da i yieñ khaddooh yaka Wicket wa 10 deiwa kamai 23 Run yow jop ki yaka Mizoram da chi Wicket ha Puducherry ynne ka sngi.
Ka Meghalaya da jop ko yaka kylla khlem wei da phah Bat nyngkong yaka Mizoram kawa ye u kamai 129/9 na ki 50 Over wei da poi thong deiwa kamai 131/9 na ki 47.4 Overs. Ka Captain ka Meghalaya ka Debasmita Dutta kawa takha i kti ko da kamai ko 16 (Not out) wei da hap ko wow Bat boon ki por chilliang kti deiwa yoh yarap na chilliang naka Avril Syiem (7 Not out) yow pynjop yaka Meghalaya ha wakut.
Yaka kdong Run da yahkhmat daka wa wai yei Bat ka Meghalaya ka Saee Purandare kawa kamai 41 Run wei da haap ko heipor wa yoh 71/3, deiwa emkaam sa 59 Run yow jop.
Ka Daiaka Warjri da kamai ko 10 Run tangwa manda haap ko, da bood sa le ngut kiwa Bat wei da ieh yaka Meghalaya da 108/9 iwa sah saka wa Bat hei 10 wa 11 ka Dutta waka Syiem kiwa emkaam sa 22 Run yow jop.
Kini ki arngut da ye ki wow neh hadooh wa kut yow e yaka Meghalaya yei jop deiwa sah sa 2.2 Over.
Ka Dutta daka bol won da yoh ko 3/16, ka Ajima Sangma 2/19 na ki 10 Over ki yong ki. Da yoh sa mar chi Wicket yaka Solina Jaba (1/13), ka Riticia Nongbet (1/19) waka Pinky Chanda (1/28).
Discussion about this post