U Lat ka jylla u Satya Pal Malik da pynsñiaw u yei kyrmen wa ka luti wa da chim da ki ar ngut ki Montri Rangbah, u Conrad K Sangma wa u Himanta Biswa Sarma daw ye ko u pynbait syndon ya i kajia pood hapyrdi ka jylla Assam wa Meghalaya, heiwa da ong u leh wa ka sorkar pyrdi daw yarap ko ya waroh ar jylla wow pynbait ya u pood u ang.
Da ong u wa i eh na u pood u ang ym toh neidaw wa khlem pynbait nadooh wa phiah ya ka jylla, wei la toh wa da dep pynbait chwa ym mih kam ini i eh næ kynaad. Da pyntip chooh chooh u wa da dep wow yaklam leh wa waroh ar ngut ki Montri Rangbah kiwa da pynsñiaw yei thrang wow pynbait noh ya u pood u ang.
Heijooh i por u Lat da ong u wa kiwon kiwon ki kynrum kynram yong u pood u ang hapyrdi ka jylla Meghalaya wa Assam, da toh wow pynbait deiwa em i suk wa i sñiawthooh lang na waroh ar liang.