Ki khynroo khyllood wa wan na ki manyung wa duna i yoh i la kiwa dooh thaw puræ ha ki skur sorkar neibynta wow pteiñ yei puræ puthi hadien wa da Pass ki ya ka SSLC 2025, ynne ka sngi da mih ya chimbynta ki hei yakhih chong kyllaiñ myngngor wa khut pynman da ka Jaiñtia Student Union, Central Body ha laad Kiang Nangbah College, ha chirup i synraanlang ki manbei manpa deiwa emlang u Trebor R Suchen, General Secretary warim ka JSU, najrong kiwi won wa wan e kyrchaan.
Kiwa yahkhmat ka JSU wa kynthup nadooh u President, u Jersom Shylla, u General Secretary, u Nielkee Mukhim, u Vice President, u Ryngkat Diengdoh wa kiwi won ki dkhot ong ki yeini i chem chitom ki khynnah puræ toh kawa dadep pynsñiaw ki cha u Montri Rangbah ka sorkar jylla deiwa e yumut wa toh u pynheh ya ki thaw puræ ka sorkar, khamtam wa ha uni u snem ka Pass Percentage yong ki khynnah man ko kawa da ku bha.
Ong ki hawa ka sorkar dadep thooh ko ki laad ki luti kammon u pynku yei Pass Percentage ki khynroo khyllood puræ deiwa pynmih yaka CM Guide Book, weileh won ym em pynheh ko ya ka thaw puræ hawa da yoo wa ini da jia i man-u-snem.
Ka seiñ da e ko leh i kular cha ki khynnah puræ wa neiliang yong ki ym chong ngiah ki la kammon kammon leh hadooh wa waroh ki khynnah puræ u yoh skur ki wa kynthup nadooh kiwa ye u poi wa kiwa boon wym ye u poi ha kani ka sngi.
Neiliang ki khynroo khyllood wa dooh thaw puræ kiwa ye u poi cha kani ka yalang, da pynsñiaw ki i diaw wei yaam kthang hajrong i dooh thaw puræ, deiwa kyntu leh ya ki bor sorkar wow pyrkhatlang ki ya ki neibhah wym joh bor ki u su bai skur ki skur ki bru samen.
Chooh chooh ong ki wa da poi ki chei kut laad wot hawa dang angnood i mynsiem ki u pteiñ yei puræ puthi.
Kamtæ hawa kyrpaad joor ya ka sorkar wow e thaw puræ ko ya ki da ong ki, “Ym em kwah i wow chong yung hi-eh, wei ngop hei sih wa boonjait ka pyrthai, tangwa kwah i kamwa yoh stat kiwi i leh u stat i”.
Discussion about this post