15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Yachem ka KSU wa ka SBYWA neibynta wow yakrehlang ha thaaiñ khappood

0 Comments
Advertisement ad1

Khliehriat: Ka seiñ Southern Border Youth Welfare Association (SBYWA) Elaka-Rymbai & Lakdong wa ka seiñ Khasi Student Union Hangaria Unit (KSU-HU) da yachem ki ynnin ha Ladrymbai Open Hotel, neibynta u yakrehlang wow wanrah yei roi i paar hapoh ka thaaiñ khappood.

Ha kani ka yachem na ka liang ki ar seiñ da mihkhmat lyngba kiwa yahkhmat yong ki kam na ka seiñ SBYWA, u Namphrangmi L Talang Genl.Secretary, u Niyo Biam Asst. Genl. Secy., u Elija Lyngdoh (Dkhot) wa u D. Lapasam wei neilang ka KSU-HU da mihkhmat da u S.S. Lamin, President wa u G.Talang, General Secretary.

I thmu wow yachemlang toh wow em i ya sñiawthooh ya tyllilang hapoh ka thaaiñ kawa dang sahdien bha nadooh ki sarok, ki thaw sumaar, ki kaam pynroi wa kiwi de ki kaam watoh wow yarap pynku ya ka kaam uiñ ke suwari, ka ha Wah Prang wa ka Wah Tisang (Prang wa Tisang).

Chooh chooh kini ki arsein da yaklam yillu bha ki wow khut noh da ka yalang bah hapoh ka thaaiñ khappood hajrong i thmu wow yakrehlang neibynta u pynneh pynsah ya ki Dakha Doh-um ha ka Wah Prang wa ka Tisang kiwa da jan dooh jait katni heiwa da em ki damok wa tynyap khiar ya ki, wow yaklam leh ya i eh i khoo hapoh ka thaaiñ yong i, da ong u Namphrangmi L Talang, Genl. Secy. SBYWA.

Neiliang kiwa kitkaam ka KSU-HU da pynsñiaw ki yei kmen hajrong ini i pdiang sñiawbha ka seiñ SBYWA u yakrehlang hapoh ka thaaiñ deiwa thmu wow pait ya i eh i khoo yong ka thaaiñ khamtam wow pynneh pynsah ya ki dahkha doh-um, wow pynku ya ki kaam uiñke suwari ha ki ar tylli ki thaw kam ha ka Wah Tisang wa ka Wah Prang.

Kamtæ kini ki ar seiñ daw khut ki ya kawi ka yalang hapoh ka thaaiñ heiwa da rai wow khut ya waroh kiwa kitkaam chnong wa kynthup ki Waheh Chnong wa ki Secretary Chnong neibynta u yakrehlang hajrong i thmu neibyntai i bha i miat wa i roi i paar yong ka thaaiñ katwa ya ka tarik wa ka thaw daw pyntip hadien.

Share this:
Previous

Yoh nong Bangladesh ka HYC War Jaiñtia kam chibynta i pynkrehkaam ILP ka CoMSO

Next

Ka sorkar kreh ko wow pynku yei sap ki khynroo khyllood: Ramesh Pokhriyal