Hadien wa sdang piah ka yingkieñ naar ha Dwar Ksuid hadooh wa hap khang wow lai ki kari, neiliang u MLA ka Nongkrem uwa man leh u Chairman ka Meghalaya State Planning Board, u Lambor Malngiang da pynsñiaw u wa da yang i maa katni sa ya ka yingkieñ Dam ha Umiam nei ban i khia.
Da ong u wa lada ymye u pyndep ya ka yingkieñ Dwar Ksuid kawa em ha Umroi, ka yingkieñ ha Damsite leh daw haap ko ha kawi ka sngi neibhah wa i lai ki kari kiwa kit palat pood toh iwa yoo chyrkhei, heiwa da ong u wa i khia wa ye ka yingkieñ Dam man i hapoh 15 Metric Ton, itæ toh i mar wa ka kari.
U MLA da ong i wa i rta ka yingkieñ Dam katni da kut i, tangwa embhah wa man ko kawa skem, deiwa pynrap wa lada chna kam ya kiwi ki yingkieñ, da haap ko nadooh ynnu deiwa ong wa lada ymye wow pynkhor yei kdoh yeini i lai ki truck wa kit palat pood lada chna da ka yingkieñ kawa T. 30 klur leh ym myntoi.
Hawa kylli hajrong i piah noh ka yingkieñ naar du hapoh 3 tayaw, neiliang u Lambor da ong u wa ymye wow pynbaad yeiyi yeiyi, tangwa da kitu ki chnat wa pait ya ka toh u chimkhia ki, deiwa ban biang wa da yang i maa ya ka yingkieñ ha Dam Umiam wei lada katai ka yingkieñ oor ko ymtip de iyi wow jia.
