Yaphær i sñiaw ka JHADC wa ka sorkar jylla: Satyendra Garg

Shillong: Ki le tylli ki Autonomous District Council (ADC) da kylli ki na ka sorkar Meghalaya Democratic Alliance wow pyrkhat ya ki chwa wow chim ka rai wa khaddooh heiyatoh wa i pynkylla (amendment) ya ka Sixth Schedule yong ka riti synchaar ka ri.

Ya ini da pynsñiaw ha ka yalang, wa da chongknor da u symbood montri rangbah ka jylla, u Prestone Tynsong hei emlang u Joint Secretary in-charge North East na ka Ministry of Home Affairs (MHA), u Satyendra Garg ynnin ka sngi ha Shillong.

Lait na kini ki le tylli ki Council wa kynthup ya ka Khasi Hills Autonomous District Council (KHADC), Jaiñtia Hills Autonomous District Council (JHADC) wa ka Garo Hills Autonomous District Council (GHADC) da emlang ki heh yong ki chnong waphær waphær.

Hadien kani ka yalang neiliang u CEM ka KHADC, u Pynshngain N Syiem da ong u wa hadooh ympu em kawi wot leh ka yalang hapyrdi ka sorkar jylla wa ki ADC hajrong kani ka phang wow pynkylla ya ka Sixth Schedule.

Related posts

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Pynbna ka VPP ya ki kyrtong MDC ha ka JHADC wa KHADC

November 13, 2024

“Da kyntu i ya u symbood montri rangbah wow khut ya ki le tylli ki ADC wow phyllu yumut wa ka sorkar jylla chwa wow chim ko ya ka rai wa khaddooh” da ong u Pynshngain.

U Pynshngain da ong u wa da yaklam hajrong i wow pynku ya ki chuki (MDC) ha ki ADC na ka wei wow pynpsiah ya ki ha ka Article 280 yong ka riti synchaar ka ri.

Chooh chooh da ong u wa da pachat i wow kynthup ya ki ar ngut ki dkhot ha ka State Finance Commission ki wow wan na ki ADC wei i kyntien Village Council toh u pynkylla noh cha i Village Dorbar.

Neiliang u Joint Secretary in-charge North East, u Satyendra Garg da ong u wa ka Ministry da pdiang ko wow pynman ya kani ka yalang hadien wa kyrpaad u montri rangbah ka jylla, u Conrad K Sangma ha ka yalang wa man ha New Delhi ha uni u bnai wa dadep.

U Garg da ong u wa ka sorkar jylla kamjooh leh ki ADC da pachat ki yeiwa sñiaw ki ha kani ka yalang wei yeini da rah hakhmat yong ka Ministry wei kyrmen skem u wa daw ye u pynsmat wow pynkylla noh ya ka Sixth Schedule.

Da pdiang u leh wa em i slem wow pynkylla yeini hadooh 17 snem nadooh wa mut wow pynkylla ya ka ha u snem 2001, heiwa u Garg da ong u wa ha kini ki 17 snem da em le tylli ki draft.

“Man i iwa sñiawsuk wow yoo wa ka sorkar jylla wa ki ADC em ki ki jooh ki yumut lait na i pynkhlan ya ka JHADC heiwa ka kani ka Council wa ka sorkar jylla em ki jar jiar i sñiaw” da ong u Garg.