Shillong: U Prestone Tynsong uwa man u Symbood Montri Rangbah ka jylla da ong u wa ym man ko iwa eh wow booddien ya kiwa em hei maa wow yoh ya u COVID-19 hapyrdi wa boon da ki spah ngut kiwa yoh thymme ya uni u khñiang man-ka-sngi, deiwa kam leh wa hadooh kattæ ka sorkar ka dang ye kow wow yakhun neibynta u kdooh u khoom yei poor smat yong ka khlam.
Katkam i ong u Prestone wa i eh wa ka sorkar yachem ko katni toh ya kitu ki bru kiwa ye wow em hei maa u yoh ya uni u khñiang wa ym bien ki wow leh ya ki Test næ wow chong khop hapoh yung du neibynta ka 10 sngi katkam ki kyndon wa thymme wa da pynmih da ka Indian Council of Medical Research (ICMR).
Ha i jooh i por da ong u wa i ku yong kiwa yoh ya u khñiang COVID-19 toh kawa maa, heiwa da kyntu u ya ki paidbah wow man kiwa syndong khamtam wow bood ya ki kyndon kamwa da phah.
Hawa kylli, da ong u wa ka sorkar daw chim chooh chooh ko ya ki rai, tangwa kamwa man kattæ ka sorkar ym em ko i thmu wow pynman biang yaka khang chnong hanla ku kiwa yoh COVID-19 ha ka jylla da joor bha katwa dang mih ki sngi.
Da ong chooh chooh u wa ki paidbah lada kwah ki wow lait na ka khlam COVID-19 toh u yakhun ki da ki hi deiwa man kiwa syndong bha kawa man ka dawai hadooh katni wow yada.
Hawa kylli chooh chooh ya i wym sñiaw chngaaiñ yong kiwa boon ki dorbar chnong wow pynchong ya kiwa yoh COVID-19 ha ki yung ki sem, u Prestone da ong u wa ka sorkar da phah ko ya ki Deputy Commissioner wow yaklam ya phyllu yumut wa ki dorbar chnong khamtam wa ka Synjuk ki Nongsynshar Shnong ka Bri Hynniewtrep (SNSBH) yow chim lang ya i e yumut neibynta ini i kaam.
