Ka sorkar jylla ynne ka sngi da kyntu ko yaka seiñ Hynniewtrep National Liberation Council (HNLC) wym toh u pyndam noh yei yaklam yasuk kawa da dep sdang kamwa da pynbna da ka seiñ haka 3 tarik uni u bnai.
Neiliang u Montri sorkar uwa man leh uwa e ktien ka sorkar MDA-II, u Paul Lyngdoh da ong u wa hadooh katni ka sorkar ym pu yoh ko yei pyntip iyi iyi hajrong ini i rai yong ka seiñ HNLC, tangwa da yoo donhi yei pynbna yong ka seiñ du ha ki laad pathai khubor.
Da ong u wa hanla ka sorkar ym pu yoh ko yei thoh wa che na ka seiñ HNLC, tangwa da chimkhia ya ini i kaam wei mar ya liwan u Montri Rangbah, u Conrad Sangma wa u Symbood Montri Rangbah, u Prestone Tynsong uwa pait leh ya ki kaam Pohyung (Police) ha ka jylla, ka sorkar daw chong pynman yalang jhan ko hajrong ini i pynbna yong ka HNLC.
Iwi na ki phang dawa yong kiwa yahkhmat ka HNLC toh wa ka sorkar u pyndam ko ya waroh ki mukotduma (Case) pyrchah ya ki dkhot wa kiwa yahkhmat ka seiñ. Hawa kylli hajrong ini, u Paul da ong u wa ini i dawa ye wow leh deiwa pait ya ka jait mukotduma wei hadooh katwon khor ki kyndon wa da chah pynngat, neibhah hei yaklam yasuk ymtoh du wow pynhun ya kawi donhi ka liang tangwa emkaam wow em i ya sñiawthooh wow ya e kylliang wei wow ya chim kylliang.
Kam wow pynkynmoo wa iwi na ki daw wa ka HNLC pyndam wei da mih noh ko nei yaklam yasuk toh wym ye ka sorkar wow pynmankaam yei dawa yong ka seiñ wei da em leh ki mukotduma wa ki dkhot ka HNLC da chah pynngat ki hapoh i takit ka National Investigation Agency (NIA).
Discussion about this post