Shillong: U Montri Rangbah ka jylla u Conrad K Sangma da pyntip u wa ka sorkar da pan kaiphod kawa pura na waroh ki tnat sorkar yei krehkaam yong ki wei ya kani toh u pyndep ki hapoh 20 sngi chwa wa ka sorkar u chim ko ya ki laad ki luti wow pynbha ya i rukom krehkaam yong ki tnat sorkar.
Katkam i ong u Montri Rangbah da paan ya ka kaiphod krehkaam ka Integrated Basin Development Livelihood Programme (IBDLP) (kawa da pynkrehkaam da ka sorkar warim) wow khana yei krehkaam yong ka wei kammon da wanrah ko ya i myntoi ya ki paidbah chwa wa ka sorkar u leh ko ya iwa emkaam.
Da ong u wa ka sorkar ye ko u pyntyllung ko ya ki Policy wa da wanrah da ki sorkar warim wei u pynbha chooh leh ya ki lada emkaam wei da pynrap deiwa ong wa kawon kawon ka sorkar ka wanrah ko ya ki Policy neibynta i bha i miat ki paidbah ka jylla.
Hajrong khynñia kari hapoh ka nongbah
U Montri Rangbah da ong u wa ka sorkar da chna ko ya ka Committee we emlang ki montri wow pait kammon wow pynwiar yei khynñia kari ha ka nongbah Shillong wei da chna leh ya ka Task Force Committee kawa da khlieh da u montri ka tnat PWD u Prestone Tynsong khnang wow pynbait ya ini i eh wei katni dang yang ya ka kaiphod na ki tnat waphær waphær.
Heiyatoh wa i chah khang mooyong
U Montri Rangbah da ong u leh wa ka sorkar jylla ye ko u wanrah biang ya ka rai neibynta wow phah cha ka sorkar pyrdi wow pyllait noh ya i chah khang tih mooyong hapoh ka jylla.
Da ong u wa kani ka phang toh kawa jwat bha neibhah wa emkaam boon ki jnit ki jnat wa ki tnat kiwa boon wow pynbiang nadooh i emkaam wow yada ya ka rymaw wow pait ya i eh i khoo kiwa mylla i pynemkaam da ki tiar katkam ka juk stat wa katni wa kiwi kiwi.
Hajrong i chait i khiah
Hawa maitphang ya i angnood ka sorkar wow pynbha ya ka laad sumaar ha ka jylla, u Montri Rangbah da ong u wa kani ka sorkar da pynkhreh ko wow pynkrehkaam wow e dawai mynkna ya ki bru wa kjut baampong ha kani ka jylla.
Heijooh i por da pyntip u wa ha kani ka snem mang tyngka, ka sorkar da mang ko wow pynku kyrdan hadooh 32 tylli ki Sub-Centre kiwa em ha ka jylla.
U Pynku ya ka kaam uiñke suwari
Hawa yatoh wow kyntu chooh chooh ya ka kaam uiñke suwari naka spah wa da e ka rymaw, u Conrad da ong u wa emkaam yeiwa bha mynsien yong ki paidbah kiwa chong chnong kammon wow pdiang burom wow klam da ki ktien wa em akor ya kiwa wan ke cha kani ka jylla wei ini emkaam wow em i kylla ha i rukom pyrkhat yong ki bru.
Da ong u leh hadien wa yaklam u wa u montri ka tnat uiñke suwari ka ri ha kini ki sngi wa dadep, neiliang u montri da pynsñiaw u wa smat u wow e poisa neibynta wow kyntu ya ka kaam uiñke suwari hapoh kani ka jylla.
Discussion about this post