U Montri Rangbah ka jylla, u Conrad Kongal Sangma da ong u wa i tih mooyong da i stat ka juk wa katni namo ka Scientific Coal Mining ha ka jylla daw sdang noh ko nadooh uni u snem, tangwa da klam che u leh wa ym tip nadooh mynnu u ye u sdang pynkrehkaam ya ini i rukom tih mooyong.
Da ong u wa daw e mynjur noh leh ya ki kattu katni kiwa da pynkhreh ya ka Mining Plan yow ye ki wow sdang noh u tih mooyong.
U Montri Rangbah da ong u ya ini hawa jubab yeiwa kylli wa da wanrah da u MLA ka Nongpoh, u Mayralborn Syiem hapoh ka yung dorbar ynne ka sngi.
U Conrad da ong u wa katkam ka rukom kreh namo ka Standard Operating Procedure, emkaam hadooh 100 Hectare i thaw neibynta wow yaleh ya ka Mining Lease, heiwa da emkaam leh wow em ya ki kot ki sla i thaw wei hap wow su leh T. 5000 cha u Secretary of Mining yong ka sorkar jylla. Da ong u wa ini u man chwa ko du i sdang neibhah daw em leh kiwa tih mooyong kiwa rap khian.
U Conrad da ong chooh chooh u wa ini i sdang man ko kawa rap kyllaiñ wow leh, neibhah hadien wa da pyndep ya waroh iwa emkaam, ka sorkar daw phah won ko cha ka Ministry of Coal yong ka sorkar India wow e yei mynjur ya ka License, hadien itæ, ka sorkar jylla daw e laad ko wow sdang tih ya u mooyong.
Da pyntip u wa hadooh katni, da em 17 ngut kiwa tih mooyong kiwa da pynbiang ya ki kot ki sla wei da yoh ki leh ya ka Prospecting License yow sorjamin hadooh katwon em mooyong hachwa wow yoh ya ka Mining Lease.
