U montri wa pait yaka chnat i chait i khiah yong ka jylla u AL Hek da ong u wa ym toh wow pynbor ya ki paidbah næ ya uwon uwon wow chim yei dawai tika COVID-19 tangwa chong hei mon sñiawbha yong kitu kiwa wan chakhmat.
“Ym ye i wow pynbor ya kiwon kiwon wow chim yei dawai lait noh ya kitu kiwa kwah hi da i mon sñiawbha. Tangwa nga pynchlur won O ya ki paidbah wow wan chakhmat wow chim ya ini i tika COVID-19 neibynta i yada neibhah wym em i ktah iyi iyi leh,” da ong u AL Hek hawa klam wa ki laad pathai khubor.
“Ileh wow tieñ ya i dawai yada COVID-19 hawa ym em i ktah iyi iyi, heiwa hadooh 95% ki bru kiwa da chim ya ini i dawai ym em i ktah iyi iyi, kamtæ nga pynchlur O ya ki paidbah wow wan chakhmat yow chim yei tika COVID-19 neibynta wow yada,” da ong u.
Hawa kylli, u Montri da ong u wa hadooh katni ym pu yoh kawon kawon ka ujor wa em i chah pynbor wow chim yei tika COVID-19 wei kamtæ ym pu ye wow ong iyi iyi hajrong ini. “Lada em i chah maham wa hap chim ya ini i dawai COVID-19 khlem i mon sñiawbha, kitu kiwa ngat ha kam ini toh u wan ki chakhmat wow ujor cha ka chnat i chait i khiah næ cha ka sorkar,” da ong u Hek.
“Nga nadooh wa sdang da dep O wow pynsñiaw wa bha wow e chwa ya ini i dawai ya nga, ya ki Montri, u Montri Rangbah kamjooh leh ya u Lat ka jylla khnang wa ki paidbah u em ki yei chaniah yei e tika COVID-19,” da ong u Hek deiwa pynrap wa ini chong won ha i pynlai wa i phah yong ka sorkar bei yei yi wow e chwa wa ya kiyi wow e hadien.
