Ka Meghalaya Games 2022 kawa da toh u wai pyrda ha ka 3 tarik heiwa da em ki yalehke kiwa da sdang nadooh ynnin ka sngi kamjooh ynne ka sngi. Da mih ki dur ki dar ki thaw sah kiwa yalehke ki wym biang nadooh ki thaw thiah, ki thaw sum kamjooh ki paikhana.
Ha ki dur wa da pynpoor bha ha ki Social Media, da yoo wa i thaw thiah toh iwa da siang ha madan hapoh i Indoor Hall wa tngit wa pyrhut la-ær, i thaw sum wym biang hadooh wa da hap wow sum cha lait wa ki paikhana kiwa da sih ha JN Sports Complex.
Kiwa chimbynta ha uni u snem da em ki palat 2,400 ngut wei iwa da yoo phylla leh wa da pynsah ya ki chynrang khamtam kamjooh ki kynthai ha kani ka thaw kawa da toh wow tympra yow chna pynmiat noh kam chibynta wow pynkhreh ya ka National Games.
Neiliang ka MSOA lyngba u John F Kharshiing uwa man leh u Working President wa u Co-Chairman ka Organizing Committee da pynche u wa ki paikhana wa mih ha ki dur toh kiwa da dep khang wow pynemkaam neidaw wa sih ki wei da dep leh wow pynbiang da ki Bio Toilet yow pynemkaam deiwa ong leh wa ki paikhana wa em ha ki Hostel ki kynthai toh kiwa biang.
Ha ki dur wa da pynpoor ki bru da yoo leh wa em kiwa hap u sum cha lait, wei kiwa boon da kylli ki wa kammon u ku ki kaam yalehke hapoh ka jylla lada kamni man i pynkhreh.
Ka sorkar da booh ko leh T. 2.2 klur wow pynman ya kani ka Meghalaya Games heiwa T. 1.2 klur da pynlait cha ka MSOA yow pynman ya kani ka lympung.
Neiliang u Montri Rangbah ka jylla, u Conrad Sangma hadien wa yoo ya kini ki dur da pynsñiaw u yei wym hun wei da phah u ya kiwa toh u pait yeini wow leh yeiwa emkaam.
Puræ leh: Hap pynche ka Organising Committee ka Meghalaya Games hadien wa mih ki dur wym biang ki paikhana
