Shillong: Ka Meghalaya Unit ka Nationalist Congress Party (NCP) ynne ka sngi da pynbna ki wa daw jied ki du ya ki kyrtong wa ye u jop ha kani ka Election MLA hapoh ka jylla wa daw pynman ha u 2018.
Da ong u wa party da silet ko wa pynyieñ kyrtong ko kiwa ye u yoh du 200-300 Vote donhi ha u snem 2013, kamtæ u president ka NCP Meghalaya, u Sanbor Shullai da ong u wa, “Ha kani ka kynti u tot wei wow tip bniah bha i chwa wow jied ya ki kyrtong wei ym e laad ya ki kamtu kamni donhi wow man ki kam ki kyrtong.”
Kam wow pynkynmoo wa ha u snem 2013 ka NCP da jop ko ha ki ar thaw donhi ha South Shillong wa jop u Shullai wa ha Mendipathar wa jop u Marthon Sangma.
“Ya ini da klam sani bha i wei yei jied ya ki kyrtong daw e laad ya ki dkhot ki District wa ki Block Committee wow leh ki ya ini.” Da ong u Shullai.
Da ong chooh chooh u wa ka NCP da thmu ko wow pynyieñ kyrtong ha waroh ki 60 tylli ki Constituency hapoh ka jylla tangwa iwa duna dooh toh 45 tylli.
U Narendra Verma, uwa man leh kam u National Secretary da ong u wa ka NCP u yieñ hi ko samen wei ym bien ko u yakrehlang wa kiwi ki seiñ saiñ hima chwa ka Election wei daw pait won yeini hadien ka Election.
Da ong u leh wa boon bha ki MLA wa rim wa kwah u psiah cha ka NCP.
Hei yatoh won wa i rukom bichaar ka sorkar MUA-II da ong u wa pait du kiwa yut naka leh da sñiawthooh hi iyi wa jia.
Hei yatoh won wa da em ka khubor wa u MLA ka NCP u Marthon Sangma daw mih noh u naka NCP, da jubab u Verma deiwa ong wa chong ha i rai samen u Marthon.
Ka sngi wa khaddooh wow chim form wow yakhun Election naka NCP u kut ko ha ka 30-11-17 wei da saam leh ya ki form nadooh ynne ka sngi.
Discussion about this post