Ka Transport Department ka Meghalaya da pynmih ko yei pynbna paidbah (Public Notice) yow khang yei pynemkaam da ki kari ki bru samen namo ki Private Vehicle lada man ki ki ar chaka næ soo chaka yow e wai kamjooh wow kamai ki.
Ini da wan i hadien wa chah pynyap u Raja Raghuvanshi heiwa ki le ngut ki chynrang wa pynyap oo da wan ki cha Sohra na Shillong da ki Scooty wa chim wai.
Ha kani ka Public Notice da ong wow kamai da ki kari Private man ko pyrchah ya ka aiñ deiwa pynche wa ha Meghalaya ym em ka Rent-A-Bike næ Rent-A-Cab Scheme iwa mut wym em u bru næ ka seiñ kiwa ye wow leh ya kam kini ki jait kaam deiwa pynemkaam da ki kari Private.
Chooh chooh da ong wa hapoh ka Motor Vehicle Act, 1988 hapoh ka Section 66 da khang yei pynemkaam ya ki kari Private wow kamai khlem da em ka Permit. Wei hapoh ka Section 192A kiwa leh yeini daw ngat ki da ka kuna wei ye ki leh wow chah kem katwa ka Section 207 won da e bor ko wow lai kem ya kini ki kari wa tyngkheiñ aiñ.
Da maham leh ya kitu kiwa leh ya ki kynja e wai kari namo ki Rental Service pyrchah ya ka aiñ, wa daw maad ki da ki kyndon aiñ wa khor nadooh wow chah daiñ kuna hadooh wow chah kset patok.
Da ong wa ini waroh da leh neibynta i bha i miat ki paidbah wei yow pyntikna wa da leh yei kaam katkam ka aiñ.
Hadien iwa jia ya u Raja, da mih leh i pynbaad wa em ki bru wa e wai da ki kari ar chaka ha Keating Road, Shillong deiwa leh pyrchah ya ka aiñ.
Discussion about this post