Shillong: U Montri Rangbah ka jylla, u Conrad K Sangma da ong u wa hanla ka sorkar chem ko yei eh ha kam kini ki por wow wanrah næ wow phah da kiwi ki kynhun wow leh ya i thooh bniah, tangwa lada emkaam, man ko kawa smat wow wanrah sa ar næ le kynhun wow leh ya katai ka kaam, neibhah ka sorkar nadooh wa sdang da klam che wa i chngaaiñ yong ki paidbah toh iwa hakhmat dooh.
Da ong u wa i thung yong ka sorkar ya ki bru na North Eastern Hill University (NEHU) wa na ka Indian Institute of Tecnology (IIT), Guwahati, kam ki stat wow thooh bniah hawa yatoh wa i pynbaad wa em i lait yong ka la’erbih (Radiation) na i piah ki top pynlang tngit Uranium ha ka chnong Nongbah Jynrin, toh na i daw wa kini ki ar tylli ki skurbah toh kiwa laitlooid, wei ha i jooh i por toh wa ka sorkar daw yoh smat yaka Report, neibhah kamwa man kattæ em i eh wow wanrah da kiwi ki kynhun.
U Conrad da ong wa ya katni, ka NEHU wa ka IIT toh ki kynhun kiwa biang wow leh ya i thooh bniah, wei ka sorkar daw yang ko yaka Report wa daw phah ki, deiwa pynrap wa i lai pait lai thooh bniah hajrong itai i pynbaad daw pteiñ ki neibynta i chngaaiñ kiwa chong chnong.
Kam wow pynkynmoo wa hadien wa ka sorkar jylla da pynbna ko wow thung da ka kynhun wow thooh bniah, ki seiñbhalang da ong ki wa ym chaniah lada wan da kiwa daw leh chilliang kiwa da dep wow yoh yrap poisa naka UCIL waka AMD.
Neiliang u Chief Secretary ka jylla u M.S Rao leh da pyntip u wa daw phah ya ka IIT, Guwahati wa ka NEHU, wow lai pait cha ka thaaiñ wa em u Uranium, tangwa ka Khasi Student Union (KSU) SWKH da pynsñiaw ko yei pyrchah deiwa ong wa kitai ki skrubah toh kiwa da chah chiliang chwa wei daw murieh ki yeiwa sakhiat.
Haba kylli na u Montri Rangbah, da ong u wa ka sorkar ym em booh por ko ya ka NEHU wow pynpoi ya ka Report, wei ye ko wow chimpor, katwa hawa yatoh waka IIT Guwahati, da pyntip u wa ka sorkar ym pu yoh ya i jubab na katai ka skurbah lada bien ko næ ym bien ko wow leh ya iwa da tyrwa ka sorkar.
